On May 15, 2019, at 18:32, Jeffrey Clark <jmclark85@gmail.com> wrote:
Saj Daghaj’a’? yIDel.
naH jajmeywIj HochHom Saj wIghajbe'. qaStaHvIS DIS puS ghotI' puS DIghaj 'a SIbI'Ha' Heghpu'. 'ej qaStaHvIS jaj puS targh (mu' ru' yIchaw', tera' Ha'DIbaH Seghvam DelmeH mu' wIHutlhmo') wIghaj je. wa' jaj juH qachmaj tlhopDaq loSlaw'taH targh mach 'e' wItu'pu'. mongDech Hutlh. qorDu'Daj wISammeH Dat vepmey DIlanpu', 'ach nuQumpu' pagh. Saj Qel wISuchpu' 'ej DIrDaj bIngDaq 'ul per tu'be'. 'utbogh rop botmeH Hergh Hevpu' targhvam. qorDu'maj muvpu', 'a ngajqu'pu' matay'meH poH. tawHomDaq mayIttaHvIS targhvam lutu'pu' jIlpu'ma' chu' 'ej jachpu' puqchaj; jatlh: «targhmaj 'oH!» ghIq qorDu'vetlh cheghpu'. DuSaQ'a'Daq jIHaDtaHvIS rut juH pa'meywIj DabtaH vIghro'mey. vIghro' vIparHa'qu' 'a muchuy'moH 'ej mInDu'wIjvo' 'onroSmey pummoH 'ej porghwIj naQ luyulmoH 'ej jItlhuHchu' 'e' lubot. vaj jIHvaD loQ qay' vIghro'. jav vIghro'mey QorghtaH wa' jupwI', 'ej qaStaHvIS DIS puS juH pa'mey DIlIn ghaH jIH je. wa'maH ben jISawpu' 'ej Soch ben qorDu'maj muvpu' targhmaj. ngugh wej puqpu' DIHutlh 'ej targh mach wInej. ngugh roD malengtaHvIS nutlhej targh wIneH, 'ej tlhoy tInchugh, Qatlhqu'choH leng. vIghro' DIparHa' 'ej be'nalwI' naH jajmey vIghro' ghajpu' 'a loQ jIHvaD qay'mo' vIghro' targh neH wIqel. Saj toDwI' tum wIrI'ta' 'ej chaHvaD machbogh targh ru' wIQorghqangtaH 'e' wISovmoH. targh machqu' nungeHpu'. ngugh roptaH targhvam; yItlaHchu'be'taH 'ej Doy'qu'law'taH. rop lungu'laHbe'law'taH Saj Qelpu'. luvor 'e' lunID 'a Do'Ha' roptaH. Do', SIbI'Ha' rop ngu'ta' Saj Qel le'. targh porgh naQ ngejtaH 'atlhqam 'e' tu'. vabDot HomDu'Daj rIDlI' 'atlhqamvetlh. ghIq Hergh chu' chuppu' Qel 'ej pay' pIvchoH. juHmaj 'elpu'DI' targhvam SIbI' qorDu'maj muv wIneHbej, 'a roptaHvIS qorDu' muv net tuch 'ej targh ru' 'oHnIStaH. vaj pIvchoHmo' tagha' qorDu'maj muvlaH rIntaH. matlhchu' targhmaj 'ej wImuSHa'qu'. qorDu'maj muvpa', “Lily” 'oH pongDaj'e', 'ej pong wIchoHbe' 'e' wIwuq, 'eymo' pong 'ej pong chu' wIghojmoH wIneHbe'. DaH loQ qanchoH 'a qanqu'be'. chaq Hut ben wa'maH ben ghap boghpu' 'e' wIloy, 'a Sovchu' pagh. DaH cha' puqpu' DIghaj; jav ben boghpu' puqma' qan 'ej wa'maH wen boghpu' ghuma' Qup. wej ben puqma' qan wIqIHpu' 'ej reH targhvam qawlaHbej. targhvam wov'on qawlaH je nenchoHtaHvIS ghuma' 'e' vItul. ghu vuQlaw' targh, 'ej qaStaHvIS DIS law' nItebHa' reHlaHtaH 'e' vItul. cha' mIllogh vIbon: teqSaS 'InSong tlhopDaq Qam, 'ej quSlab vImej 'e' bot.
