https://youtu.be/OlSDehUDiQk HaSta ta bejlaHbe’chugh vay’, yap ghItlh ‘e’ vItul: SuQujrup'a'? DaHjaj tlhIHvaD tlhIngan Quj tIQ vIDel vIneH. napqu' Qujvam vaj nom boghojlaH 'e' vIpIH. “yIH, taj, bIQ” 'oH Qujvam pong'e'. quv qaD 'oH Qujvam'e'. vaj toDuj tob. luQuj cha' QujwI'pu'; ghopDu'chaj lo'. yIH, taj, bIQ ghap wIvnIS Hoch QujwI' 'ej wIvDaj muchmeH ghopvaD wIv 'oSnISmoH. DaH wej QujmeH ghop tonSaw' vI'agh. wa'DIch: yIH 'up 'oS ro'. cha'DIch: taj jej 'oS SIqwI' qaywI' je. 'ej wejDIch: bIQ puj 'oS ghIt SaS. tonSaw' rap luwIvchugh QujwI'pu', Qap pagh 'ej qaDchuqqa'nIS. 'a tonSaw'mey pIm wIvchugh QujwI'pu', QapnIS wa' QujwI'. yIH qaDDI' taj, yIH 'up DuQ taj jej. Qap taj. taj qaDDI' bIQ, taj jej HaH bIQ puj. taj HaHlu' net chaw'chugh, taj raghmoHlaH bIQ. vabDot SIbI'Ha' ngoSlaHchu'. Qap bIQ. 'ej bIQ qaDDI' yIH, bIQ puj tlhutlh yIH 'up. tlhutlhchu' 'ej natlh. Qap yIH. tonSaw'mey'e' wIvbogh QujwI'pu' muchDI', quqnIS, vaj roD quqmoHmeH mu' puS jatlhlu'. ghantoH vI'agh: yIH, taj, bIQ, loS, wej, cha' DaH Qujvam quv boSovchu'. vaj batlh boQujnIS. Qapla'.