[tlhIngan Hol] ngem 'an

mayqel qunen'oS mihkoun at gmail.com
Sat Mar 7 01:31:26 PST 2020


ramvetlh..

ngemDaq yIttaHvIS melkor maqlegh, tagha' ngem  Hopqu'bogh Daq
chImlu'chu'ta'bogh paw'ta'.

pa', lojmIt'a' tu'lu'..

lojmIt'a'vam chenmoHwI' Sovpu' pagh, 'ach wa' ngoD luSovchu'pu' Hoch
elfpu', Hoch dwarfpu', Hoch Humanpu' je.. pa' lucholbe'qu'nIS.. not..

wej gho-lIvqa'nanmey yugh lojmIt'a'vam, 'ej wa' lIvqa'nan qoDDaq 'oHtaH
latlh lIvqa'nan'e'.

pa' pawta'pa' maqlegh, vIHbe'chu'taH lojmIt'a' lIvqa'nanmey, 'ach
pawta'DI', 'ej maqlegh jemchoHpu'DI' lojmIt'a', tlhe'choHpu' wej
lIvqa'nanmeyvam. 'ach, jaS tlhe'pu' Hoch, 'ej tlhe'taHvIS lIvqa'nanmeyvam,
pImpu' Hoch lIvqa'nan lurgh..

ghIq, wa' qIvDaj SIHmoHta' maqlegh, qIvvamDaq cha'neHDu'Daj lanta', 'ej yav
HottaHvIS latlh qIvDaj, yav leghmeH loQ mongDaj SIHmoHta'. 'ej rItmeH
mu'mey jatlhmeH tlhupchoHta'. mu'meyvam QoylaHchu'pu' pagh; 'ach, SIbI'
narghchoHpu' wanI' qaSchoHmoHpu'bogh mu'meyvam.

tlhupchoHta'pa' maqlegh, nom tlhe'taH wej gho-lIvqa'nanmey, 'ach
tlhupchoHta'DI', 'ej tlhuptaHvIS, nupchoHlI' Dochaj. vaj, tagha', mevpu'
wej ghomey, 'ej mevpu'DI', DonchoHchu'pu' Hoch, 'ej leDchoHpu' ghomey yav
je.

'ach, qaSpu' je latlh wanI' taQ..

tlhe'choHpu'pa' lIvqa'nanmey, pagh ngaS lIvqa'nanmey qoD; 'ach
DonchoHchu'pu'DI' Hoch lIvqa'nanmey, qoDchajDaq narghchoHpu' betgham
rurbogh Hap qIj'e'. 'ej wallaw'taH Hapvam.

Huylaw'taH Hapvam, 'ej ngemDaq pagh latlh wab QoylaH vay',
tamchoHchu'pu'mo' Hoch; lot lIb jemlaHlaw' ngemvam..

ngugh, mInDu'Daj SoQmoHta' maqlegh; 'ach yaplaw'be'.. vaj, mInDu'Daj
SoQmoHta'bogh velchu'meH, mInDu'DajDaq nachDajDaq baghta' weSjej qIj 'ay',
'ej ghIq nachDaj Hoch velmeH, nachDajDaq pepta' 'eSqa'Daj nach velmeH 'ay'.

qo'DajDaq leghmeH vay', qa' mInDu'Daj lo'nIS; 'utbe' porgh mInDu'.. wejlogh
ngugh 'e' bom, mInDu'Daj nachDaj je veltaHvIS.

'ej tagha', latlh qIvDajvaD yav HotmoHta' je, cha'neHDu'Daj yav je
chongmoHta', 'ej wa' ro'Daj HottaHvIS latlh ro'Daj, 'ej mongDaj
SIHmoHtaHvIS, tlhupta':

DaH, ngay'Daj jantor moj arda Hoch; ngay'Daj jantor moj 'ej QIlchoH..

ghIq, wewchoHpu' wej gho-lIvqa'nanmey, 'ej melkor qo' mIlloghmey
HotlhchoHpu' lojmIt'a' qoD Hap qIj.. gho-yu'eghmey rur; ngem chIqbogh
gho-yu'eghmey'e'.. bI'reS, mach Hoch yu'egh, 'ach qaStaHvIS poH, Sach Hoch
yu'egh, 'ej yu'egh veb tIn law' yu'egh vorgh tIn puS.

melkor qo' mIlloghmeyvam, yu'eghmeyvam Hajchu' ngem DepmeyDaj je; SIbI',
chISchoH Hoch Sormey'e' Hotpu'bogh yu'eghmey 'ej ghIq 'anchoH; ngem
Depmey'e'.. yu'eghmeyvam narghmeH, 'ej  ngemvo' Haw'meH qetchoHta'.. 'ach,
narghlaHpu'be' 'op, vaj 'anchoH je..

qaStaHvIS poH, ghurtaH HoS tlhuDbogh lojmIt'a', 'ej tagha', jorpu'.
jorpu'DI', ngabpu' melkor maqlegh, 'ach motlhchoHbe'pu' ghe'choHbogh ngem
DepmeyDaj je.

ngemvam luchol arda Humanpu' yoqpu' je, ghIq not 'e' lungIl, 'ej qaStaHvIS
vatlh DIS poHmey veb, ngemvam luDelmeH pongmey Sar lo': 'anchoHbogh ngem,
nagh ngem, ghIjchu'bogh ngem, QIlmoHbogh ngem..

~ mayqel qunen'oS
-------------- next part --------------
An HTML attachment was scrubbed...
URL: <http://lists.kli.org/pipermail/tlhingan-hol-kli.org/attachments/20200307/2cb204aa/attachment.html>


More information about the tlhIngan-Hol mailing list