<div dir="auto"><div dir="auto">ramvetlh..</div><div dir="auto"><br></div><div dir="auto">ngemDaq yIttaHvIS melkor maqlegh, tagha' ngem  Hopqu'bogh Daq chImlu'chu'ta'bogh paw'ta'.</div><div dir="auto"><br></div><div dir="auto">pa', lojmIt'a' tu'lu'.. </div><div dir="auto"><br></div><div dir="auto">lojmIt'a'vam chenmoHwI' Sovpu' pagh, 'ach wa' ngoD luSovchu'pu' Hoch elfpu', Hoch dwarfpu', Hoch Humanpu' je.. pa' lucholbe'qu'nIS.. not..</div><div dir="auto"><br></div><div dir="auto">wej gho-lIvqa'nanmey yugh lojmIt'a'vam, 'ej wa' lIvqa'nan qoDDaq 'oHtaH latlh lIvqa'nan'e'.</div><div dir="auto"><br></div><div dir="auto">pa' pawta'pa' maqlegh, vIHbe'chu'taH lojmIt'a' lIvqa'nanmey, 'ach pawta'DI', 'ej maqlegh jemchoHpu'DI' lojmIt'a', tlhe'choHpu' wej lIvqa'nanmeyvam. 'ach, jaS tlhe'pu' Hoch, 'ej tlhe'taHvIS lIvqa'nanmeyvam, pImpu' Hoch lIvqa'nan lurgh..</div><div dir="auto"><br></div><div dir="auto">ghIq, wa' qIvDaj SIHmoHta' maqlegh, qIvvamDaq cha'neHDu'Daj lanta', 'ej yav HottaHvIS latlh qIvDaj, yav leghmeH loQ mongDaj SIHmoHta'. 'ej rItmeH mu'mey jatlhmeH tlhupchoHta'. mu'meyvam QoylaHchu'pu' pagh; 'ach, SIbI' narghchoHpu' wanI' qaSchoHmoHpu'bogh mu'meyvam.</div><div dir="auto"><br></div><div dir="auto">tlhupchoHta'pa' maqlegh, nom tlhe'taH wej gho-lIvqa'nanmey, 'ach tlhupchoHta'DI', 'ej tlhuptaHvIS, nupchoHlI' Dochaj. vaj, tagha', mevpu' wej ghomey, 'ej mevpu'DI', DonchoHchu'pu' Hoch, 'ej leDchoHpu' ghomey yav je.</div><div dir="auto"><br></div><div dir="auto">'ach, qaSpu' je latlh wanI' taQ..</div><div dir="auto"><br></div><div dir="auto">tlhe'choHpu'pa' lIvqa'nanmey, pagh ngaS lIvqa'nanmey qoD; 'ach DonchoHchu'pu'DI' Hoch lIvqa'nanmey, qoDchajDaq narghchoHpu' betgham rurbogh Hap qIj'e'. 'ej wallaw'taH Hapvam.</div><div dir="auto"><br></div><div dir="auto">Huylaw'taH Hapvam, 'ej ngemDaq pagh latlh wab QoylaH vay', tamchoHchu'pu'mo' Hoch; lot lIb jemlaHlaw' ngemvam..</div><div dir="auto"><br></div><div dir="auto">ngugh, mInDu'Daj SoQmoHta' maqlegh; 'ach yaplaw'be'.. vaj, mInDu'Daj SoQmoHta'bogh velchu'meH, mInDu'DajDaq nachDajDaq baghta' weSjej qIj 'ay', 'ej ghIq nachDaj Hoch velmeH, nachDajDaq pepta' 'eSqa'Daj nach velmeH 'ay'.</div><div dir="auto"><br></div><div dir="auto">qo'DajDaq leghmeH vay', qa' mInDu'Daj lo'nIS; 'utbe' porgh mInDu'.. wejlogh ngugh 'e' bom, mInDu'Daj nachDaj je veltaHvIS.</div><div dir="auto"><br></div><div dir="auto">'ej tagha', latlh qIvDajvaD yav HotmoHta' je, cha'neHDu'Daj yav je chongmoHta', 'ej wa' ro'Daj HottaHvIS latlh ro'Daj, 'ej mongDaj SIHmoHtaHvIS, tlhupta':</div><div dir="auto"><br></div><div dir="auto">DaH, ngay'Daj jantor moj arda Hoch; ngay'Daj jantor moj 'ej QIlchoH..</div><div dir="auto"><br></div><div dir="auto">ghIq, wewchoHpu' wej gho-lIvqa'nanmey, 'ej melkor qo' mIlloghmey HotlhchoHpu' lojmIt'a' qoD Hap qIj.. gho-yu'eghmey rur; ngem chIqbogh gho-yu'eghmey'e'.. bI'reS, mach Hoch yu'egh, 'ach qaStaHvIS poH, Sach Hoch yu'egh, 'ej yu'egh veb tIn law' yu'egh vorgh tIn puS.</div><div dir="auto"><br></div><div dir="auto">melkor qo' mIlloghmeyvam, yu'eghmeyvam Hajchu' ngem DepmeyDaj je; SIbI', chISchoH Hoch Sormey'e' Hotpu'bogh yu'eghmey 'ej ghIq 'anchoH; ngem Depmey'e'.. yu'eghmeyvam narghmeH, 'ej  ngemvo' Haw'meH qetchoHta'.. 'ach, narghlaHpu'be' 'op, vaj 'anchoH je..</div><div dir="auto"><br></div><div dir="auto">qaStaHvIS poH, ghurtaH HoS tlhuDbogh lojmIt'a', 'ej tagha', jorpu'. jorpu'DI', ngabpu' melkor maqlegh, 'ach motlhchoHbe'pu' ghe'choHbogh ngem DepmeyDaj je.</div><div dir="auto"><br></div><div dir="auto">ngemvam luchol arda Humanpu' yoqpu' je, ghIq not 'e' lungIl, 'ej qaStaHvIS vatlh DIS poHmey veb, ngemvam luDelmeH pongmey Sar lo': 'anchoHbogh ngem, nagh ngem, ghIjchu'bogh ngem, QIlmoHbogh ngem..</div><div dir="auto"><br></div><div dir="auto">~ mayqel qunen'oS</div></div>