'a wejvam'e' baseball 'oH poymarna''e'.. qaStaHvIS yInwIj Hoch, jISIv:
boqwI' chaH'a' jeqqIj 'uchbogh nuv'e' pogh tuQbogh nuv'e' je ??? 'ej 'Iv ghaH QujmeH moQ vo'bogh nuv boqwI''e' ???
chaq not jISov.. tuch - yo' qIjDaq jIHtaHvIS - qaStaHvIS Hoch poHmey, mumISmoH poymarvam..
Hut inning yugh baseball Quj. poHHom vIpong. taghDI' poHHom, fielders 'oH wa' ghom'e' 'ej at bat 'oH latlh ghom'e'. moQ raQwI', jeqqIj QachwI' je vIpong. moQ mupDI' QachwI', qetwI' moj. yotlhDaq wej waw' tu'lu': waw' wa', waw' cha', waw' wej. latlh waw' rurbogh Daq tu'lu': juH ponglu'. yotlh botlhDaq Qam pitcher; chuHwI' vIpong. juHDaq Qam tlhurwI'. Hoch waw'Daq Qam raQwI'. waw' cha' waw' wej jojDaq Qam shortstop; raQwI'vamvaD pong vIghajbe'. waw'mey HayDaq Qam wej raQwI': Hay nIH, Hay poS, Hay botlh.
juHDaq Qam QachwI'. tlhurwI'vaD moQ chuH chuHwI'. Qachchugh QachwI' 'ej moQ mupbe'chugh, QachHa'ghach baj. mupchugh 'ach yotlh Hur jaHchugh moQ 'ej wej cha' QachHa'ghach bajpu'chugh, QachHa'ghach baj. wej QachHa'ghach bajchugh QachwI', lujpu' ghaH 'ej QachchoH latlh QachwI'.
moQ mupchugh QachwI' 'ej yotlh jaHchugh 'oH, qetwI' moj QachwI' 'ej waw' wa'Daq qet. moQ 'uchlaHchugh waw wa' raQwI', pawpa' qetwI', lujpu' qetwI' 'ej ghom cheghnIS. waw' wa'Daq pawchugh qetwI', waw' cha'Daq qetlaH, 'ach qetwI' Hotchugh moQ ghajbogh raQwI', lujpu' qetwI'. Hoch waw' HotnIS qetwI', ghIq juHDaq qetlaH. juH pawchugh qetwI', Qapla' baj ghom.
waw' wa'Daq ratlhchugh qetwI' 'ej latlh moQ mupchugh QachwI' chu', qetnIS qetwI'; waw'Daq QamlaH wa' qetwI' neH. waw' ghoSnISchugh qetwI' 'ej 'oHDaq Qamchugh moQ 'uchbogh raQwI', lujpu' qetwI'.
wejlogh lujpu'DI' ghom, raQwI' moj QachwI' 'ej QachwI' moj raQwI'. wejlogh lujpu'DI' Hoch ghom, mev poHHom. mevDI' Hut poHHom, mev Quj.
latlh chut tu'lu'. chut nap neH vIDelpu'. waw' nIHlaH qetwI'.
qetwI'vaD juH pawmoHmeH, pe'vIlHa' muplaH QachwI' 'ej
'an'eghmoHlaH. chuHHa'chugh chuHwI', ball baj QachwI' 'ej
loS ball bajchugh, waw' wa'Daq yIt chaw'lu'.
pIj baseball luyajbe' Europengan. QIt Qujlu'.
mupDI' QachwI', nom Qujlu' 'ach mevDI' moQ, leS Hoch. Quj
bejlu'taHvIS, QujwI' Dup to' je lurIchlu'. QujwI' lurIchlu'. Soj
'ey Soplu'. leSmoH baseball 'ej SeymoH.
-- SuStel http://trimboli.name