ngechDaq lIghtaHvIS chaH, ghel gimli: Daqvam chImDaq yInlaH mangghoH
Sar nuq; 'ej jang legolas: mangghom mIgh.. ghIq QIjchoH:

poH nI' ret, gondor ta' QavvaD lay' HuD'a' loDpu': luQaHmeH pawqang
'ej Suv. 'ach lIbchoHDI' Qob'a' 'ej QaH SuqnIschu' gondor, Haw' chaH..
HuD'a' QIbmeyDaq ngab. vaj roj luSuqlaHbe'meH chaH qIch isildur.
'Ipchaj luquvmoHDI', qaSDI' wanI'vam'e' neH, ghanHa'qa'laH qa'chaj.

choS QIbmeyvo' rItlaH 'Iv. nuvpu''e' lIjbogh Hoch..

loD cho'wI' neH.. loDvaD lay'ta'bogh chaH. northvo' paw. raD Qob'a'.
lojmIt'a' vegh, HeghwI'pu' tawmey 'el..

Peter Jackson lut Daja'qa'; ghu'vam vIlughnISmoH 'ej Tolkien mu' nIv vImugh:

«Heghpu'wI' taw!» jatlh Gimli. «ghIj pongvetlh 'ej parba' Rohanngan. rurbogh taw lulo'chugh yInwI' taHlaH'a'? vabDot tawvetlh boveghchugh, chay' Mordor HIv bot puSqu'wI'?»

«not tawvetlh lulo' yInwI' puHvam luDabchoHtaHvIS Rohanngan» jatlh Aragorn, «chaHvaD ngaQmo'. 'ach poHvam mIgh 'oH lo'laH Isildur tuqnIgh, ngIlchugh. peQoy! Rivendellvo' vavDaj QIn muqempu' Sov pIn'a' Elrond puqloDpu'; ja' AragornvaD tuch ja'wI' mu' tIqawmoH, Heghpu'wI' taw tIqawmoH je.»

«'ej nuq ja' tuch ja'wI'?» jatlh Legolas.

«jatlh Malbeth, tuch ja'wI', che'taHvIS Arvedui, Fornost ta' Qav» jatlh Aragorn:

puH vel QIb tIq,
'ev tIngDaq SIchlI'bogh tel rur.
Qom chalqach; ta' lom qachmeyDaq
chollI' San. vem Heghpu'wI';
DaH lay'Ha'wI' poH 'oH:
Erech naghDaq Qamqa' chaH
'ej pa' HuDDaq gheb rIl 'e' Qoy.
gheb rIl 'Iv? qIjbogh choSvo' 'ej wovbogh
ghot'e' lIjlu'pu'bogh rIt 'Iv?
'Ip lulay'bogh HevwI' tuqnIgh.
'ev chan 'evvo' paw, ruchmoH 'utchu'ghach:
Heghpu'wI' taw lojmIt vegh.

«Hurghbej taw» jatlh Gimli, «'ach taw Hurgh puS bom mu'vam Hurgh puS.»

«SovlIj Daghur DaneHchugh HItlhej» jatlh Aragorn; «DaH tawvetlh vIghoS. jImej 'ach jIQuchbe'; jImejnISqu' neH. vaj bIghoSchugh bIghoSqang 'e' vIpoQ. bIghoStaHvIS bIvumqu' 'ej DaghIjqu'lu'. qabqu'.»

«vabDot Heghpu'wI' tawDaq qatlhejchu'.» jatlh Gimli.

«qatlhej je» jatlh Legolas, «mughIjbe'mo' Heghpu'wI'.»

«QormeH mIw lIjpu'be' ghot lulIjlu'pu'bogh 'e' vItul» jatlh Gimli, «lIjpu'chugh DISujnISbe'.»

«ErechDaq mapawchugh 'e' wIghoj» jatlh Aragorn. «'ach Sauron luSuv 'e' lulay', 'ej 'Ipvetlh wem; vaj SuvnIS 'Ip luta' luneHchugh. ErechDaq Qam nagh qIj; jatlhlu' Númenorvo' qem Isildur; HuDDaq lanlu', 'ej Gondor cherlu'pu'DI' Isildur boq HuD ta' 'e' lay'meH HuD ta', nagh pongpu'. 'ach cheghDI' Sauron 'ej HoSghajqa'DI', 'Ipchaj luta'meH HuD loD rIt Isildur, 'ej ta'Qo': Sauron luquvmoHmo' qaStaHvIS DISmey lunaDHa'lu'bogh.

«ghIq ta'DajvaD jatlh Isildur: <ta' Qav SoH. pIn'a'chaj qIj jeychugh 'ev tIng loD, SoH nughlIj je vI'Igh: not SuleS 'Ipchaj Data'pa'. qaStaHvIS DIS lutoghbe'bogh qaS noHvam, 'ej borItqa'lu' rInpa' noH.> 'ej tlheD Isildur QeHmo', 'ej SauronvaD Qoj 'e' ngIlbe'; 'ej HuD Daqmey peghDaq So''egh 'ej latlh loDpu' Huqbe', 'ach QIt HuD chImDaq machchoH. 'ej Erech HuD yoSDaq nugh DabmeH DaqmeyDaq je ghIj Qongbe'bogh Heghpu'wI'. 'ach tavetlh vIghoSnIS, muQaHlaHbe' yInwI'.»

Hu'. «Ha'!» jach, 'ej yanDaj QemHa', 'ej nom vengHom vaS choSDaq wov. «Erech naghDaq! Heghpu'wI' taw vIghoS. mutlhej tlhejqangwI'!»

jangbe' Legolas Gimli je, 'ach Hu' 'ej vaSvo' Aragorn tlha'. ghommeH yotlhDaq loStaH Rangers; nachDaj luvellu'pu'; vIHbe'taH 'ej tamtaH. lIghrup Legolas Gimli je. RoherynDaq Sup Aragorn. ghIq gheb'a' rIlrup Halbarad, 'ej Helm's Deep Dat Daq Qoylu': 'ej ghIq pay' lIghchoH; Coomb bIS'ubDaq lIghtaH; pe'bIl wab rur, bejtaHvIS reDDaq vengHomDaq ghap ratlhbogh loD 'ej lumerlu'bogh.

-- 
SuStel
http://trimboli.name