<div dir="ltr"><p>(The entire text can be found here: <a href="https://sacredtextsinklingon.wordpress.com/athena-pongmey-chadich/">https://sacredtextsinklingon.wordpress.com/athena-pongmey-chadich/</a>. A big thanks to the people mentioned here: <a href="https://sacredtextsinklingon.wordpress.com/acknowledgements/">https://sacredtextsinklingon.wordpress.com/acknowledgements/</a>)<br></p><p><strong>acraea/akraia/acraeus/akraios:</strong> HuDmeyDaq bIHtaH ‘op Qun chIrgh’e’, ‘ej <em>acraea</em>/<em>akraia</em>/<em>acraeus</em>/<em>akraios</em> bIH Qunpu’vam pong cha’DIch’e’. be’ ghaHchugh Qun’e’, <em>acraea</em>/<em>akraia</em> ‘oH pongDaj cha’DIch’e’, ‘ej loD ghaHchugh Qun’e’, <em>acraeus</em>/<em>akraios</em> ‘oH pongDaj cha’DIch’e’. <em>zeus</em> <em>hera</em> <em>aphrodite</em> <em>pallas</em> <em>artemis</em> latlhpu’ je chaH Qunvam’e’.</p>



<p><strong>aeolomorphus:</strong> tu’qomDaj choHlaHbogh vay’.</p>



<p><strong>aethyia/aithuia:</strong> <em>megaria</em>Daq <em>athena</em> quvmoHlu’taHvIS, <em>athena</em> pongvam cha’DIch lo’lu’ je. bIQ’a’ qoD ‘elbogh vay”e’ Del <em>aithuia</em> mu’, ‘ej SorHa’lu’chugh, bIQ Duj Del je, vaj bIQ Duj chenmoHmeH mIw’e’ ghojmoHpu’bogh <em>athena</em> boplaw’ pongvam cha’DIch, ‘ej chIjmeH mIw’e’ ghojmoHpu’bogh <em>athena</em> boplaw’ je. ‘ach pongvam cha’DIch mung bopbogh latlh nger tu’lu’ je; <em>gannet</em> mID vay’ Del pongvam cha’DIch.</p>



<p><strong>ageleia/ageleis:</strong> pongvam cha’DIch luQIjbogh wej nger tu’lu’. nger wa’: <em>oxen</em>/<em>kine</em> QanwI’ Del pongvam cha’DIch. nger cha’: {Soch} mI’ wu’ ‘oS <em>ayaeleia</em> mu’, qo’vam chut’a’ mI’ ‘oH Soch’e’, ‘ej qo’vam chut’a’ rangmo’ <em>athena</em>,
 pongvam cha’DIch lInglu’pu’. ‘ach nger wejDIch tu’lu’ je, ‘ej nuvpu’ 
Devbogh/Qanbogh vay’ Del pongvam cha’DIch ‘e’ SovmoH ngervam.</p>



<p><strong>aglaotimus:</strong> vay’ quvmoHqu’lu’bogh.</p>



<p><strong>agoraea/agoraia/agoraeus/agoraios:</strong> ngevmeH Daq vay’. veng ngevmeH DaqDaq ghom nuvpu’, ‘op QunvaD ghommeyvam QanwI’ luDamlu’, vaj Hoch QunvamvaD <em>agoraea</em>/<em>agoraia</em>/<em>agoraeus</em>/<em>agoraios</em> ponglu’; be’ ghaHchugh Qun’e’, ghaHvaD <em>agoraea</em>/<em>agoraia</em> pong cha’DIch lo’lu’, ‘ej loD ghaHchugh Qun’e’, ghaHvaD <em>agoraeus</em>/<em>agoraios</em> ponglu’. <em>zeus</em> <em>athena</em> <em>artemis</em> <em>hermes</em> latlhpu’ je chaH Sarvam Qun’e’.</p>



<p><strong>ajantis:</strong> <em>ajax</em> vay’. <em>salamis</em> Sub ghaH <em>ajax</em>‘e’.</p>



<p><strong>alalcomeneis/alalkomeneis/alalcomene:</strong> pongvam cha’DIch lubopbogh ‘op nger tu’lu’. Sub ghaHbogh <em>alalcomenes</em>‘e’ bop pongvam cha’DIch ‘e’ SovmoH wa’ nger, ‘ej <em>boeotia</em> <em>alalcomenae</em> vengHom (pa’ boghpu’ <em>athena</em> net Har) ‘oH pongvam cha’DIch mung’e’ ‘e’ SovmoH latlh nger. ‘ach nger wejDIch tu’lu’ je’; pongvam cha’DIch lIng <em>alalkein</em> wot, vaj {HubwI’}/{HubwI’ HoSghaj} yajmoH pongvam cha’DIch.</p>



<p><strong>alcis/alkis:</strong> HoSbogh vay’. <em>macedonia</em>Daq <em>athena</em> quvmoHlu’taHvIS, pongvam cha’DIch lo’lu’ je.</p><p><strong>alea:</strong> <em>alea</em>Daq <em>mantineia</em>Daq <em>tegea</em>Daq je <em>athena</em> <em>alea</em> quvmoHlu’. <em>tegea</em>Daq <em>athena</em> <em>alea</em> chIrgh tu’lu’, chIrghvam ngo’ law’ Hoch ngo’ puS, ‘ej <em>aleus</em> (<em>apheidas</em> puqloD) ghaH chIrghvam chenmoHwI”e’ net Dam; vaj ghaytan <em>aleus</em> pongmo’ pongvam cha’DIch qonlu’pu’. tera’ DIS 394 -bov vorgh- chIrghvam meQlu’pu’, ‘ej ghIq chIrgh chu’ chenmoHpu’ <em>scopas</em>. chIrghvam chu’ tIn law’ Hoch <em>peloponnesus</em> chIrghmey tIn puS, chIrghvam Dun law’ Hoch <em>peloponnesus</em> chIrghmey Dun puS, chIrghvam luDech wej tut gho, ‘ej pIm Hoch tutvam Sar. <em>athena</em> Hew chenmoHpu’ <em>endoeus</em>, ‘e’levan Ho’ neH yugh, ‘ej ghIq ‘IHchoHmeH roma’ <em>forum</em> <em>augusti</em>, pa’ Hewvam qengpu’ <em>augustus</em>. tIQbogh lulIgh wembe’lu’bogh ‘ej quvqu’moHlu’bogh ‘oH <em>tegea</em> <em>athena</em> <em>alea</em> chIrgh’e’, Qan’eghmeH ‘ej toD’eghmeH nuv law’, pa’ lujaH, ‘ej nuvvam pong tamey tu’lu’. reH be’Hom ghaH <em>tegea</em> <em>athena</em> <em>alea</em> chIrgh maqlegh’e’,  ‘ach jaqtala’ SIQchoHpu’DI’, Qu’vam turbe’choHpu’. <em>sparta</em> <em>therapne</em> je rarbogh tawDaq <em>athena</em> <em>alea</em> Hew tu’lu’ je.</p>



<p><strong>alector:</strong> <em>rooster</em> yajmoH ‘elaDya’ mu’ <em>alector</em>.</p>



<p><strong>ambulia/amboulia/ambulius/amboulios/ambulii:</strong> <em>zeus</em> <em>athena</em> <em>dioscuri</em> je quvmoHtaHvIS <em>spartans</em>, pongmeyvam cha’DIch lo’lu’ je. loD ghaHchugh Qun’e’ luquvmoHbogh, <em>ambulius</em>/<em>amboulios</em> lulo’, be’ ghaHchugh, <em>ambulia</em>/<em>amboulia</em> lulo’, ‘ej Qun law’ chaHbogh Qun’e’ quvmoHbogh, <em>ambulii</em> lulo’. pongvam cha’DIch QIjlaHchu’be’ vay’, ‘ach chaq pongvam cha’DIch lIng <em>anaballo</em>
 mu’; lughchugh ngervam, Qunpu’vamvaD Hegh lulumbogh Qun’e’ Dam pongvam 
cha’DIch. ‘ach latlh nger tu’lu’ je. qeS vay’/qeSbogh vay’ Del pongvam 
cha’DIch ‘e’ SovmoH ngervam.</p>



<p><strong>anassa:</strong> voDleH, joH.</p>



<p><strong>anemotis: </strong>SuSmey vay’, SuSmey vItlhHa’choHmoHbogh vay’. <em>messenia</em> <em>mothone</em>Daq <em>athena</em> <em>anemotis</em> quvmoHlu’, ‘ej pa’ <em>athena</em> <em>anemotis</em> chIrgh tu’lu’. jevtaHvIS, Sep lurIQchoHmoHmo’ SuSmey vItlh, QaH <em>athena</em> ‘e’ tlhob <em>diomedes</em>, ‘ej ghIq mevpu’ SuSmeyvam. wanI’vammo’ <em>athena</em> <em>anemotis</em> chIrgh chenmoHpu’ <em>diomedes</em> net Har.</p>



<p><strong>antrodiaetus:</strong> DIS Dabbogh vay’.</p>



<p><strong>apaturia/apatouria/apatouros: </strong>tojbogh vay’. <em>athena</em> pongvam cha’DIch qonpu’ <em>aethra</em>.</p>



<p><strong>areia:</strong> vIDbogh vay’, noH bopbogh vay’, noH DI’onmey chIwbogh vay’, Suvrupbogh vay’. <em>athens</em>Daq pongvam cha’DIch <em>athena</em> quvmoHlu’ je. <em>athens</em>Daq <em>ares</em> chIrghDaq <em>ares</em> <em>aphrodite</em> <em>enyo</em> je Hewmey tu’lu’, ‘ej pa’ <em>athena</em> Hew tu’lu’ je. SoSDaj chotpu’ <em>orestes</em>; <em>orestes</em> pumlu’mo’, mIwba’ SIQpu’, ‘ach chun <em>orestes</em> ‘e’ wuq <em>areopagus</em>. ghIq <em>athens</em>Daq <em>athena</em> <em>areia</em> lalDanHom taghmoHpu’ <em>orestes</em>. wuqnIStaHvIS <em>areopagus</em> loHwI’pu’, ‘ach lappu’DI’ Hoch, rapchugh Hoch vuD Dop mIvwa’mey, ghIq lap <em>athena</em> <em>areia</em>. vaj chaq <em>ares</em> ‘oHbe’ pongvam cha’DIch mung’e’, ‘ej chaq <em>ara</em>/<em>areo</em>/<em>aresko</em> bIH pongvam cha’DIch mung’e’. DIp ‘oH <em>ara’</em>e’, ‘ej QunvaD SoQ jatlhbogh vay’ -Qun tlhobtaHvIS- yajmoH mu’vam. wot ‘oH <em>areo</em>‘e’/<em>aresko</em>‘e’, ‘ej >Qun chut vIpabHa’pu’, vaj Qunpu’ vIQeHHa’choHmoHmeH, jIvang;< wanI’vam luDel ‘elaDya’ Hol mu’vam.</p>



<p><strong>arretus:</strong> <em>athena</em> DeltaHvIS <em>athena</em> <em>orpheus</em> bom, <em>arretus</em> pong cha’DIch lo’ je. vay”e’ luDellaHbe’bogh mu’ yajmoH pongvam cha’DIch.</p>



<p><strong>asia:</strong> <em>asia</em> (<em>asia</em> QIv) vay’. <em>colchis</em>Daq <em>athena</em> quvmoHlu’taHvIS, pongvam cha’DIch lo’lu’ je. pa’vo’ <em>laconia</em>Daq lalDanHomDaj luqempu’ <em>castor</em> <em>polydeuces</em> je net Har, ‘ej <em>laconia</em>Daq <em>las</em>Daq <em>athena</em> <em>asia</em> chIrgh chenmoHlu’pu’.</p>



<p><strong>assesia:</strong> <em>ionia</em> <em>assesus</em> vengmo’ <em>athena</em> pongvam cha’DIch qonlu’pu’. pa’ <em>athena</em> <em>assesia</em> chIrgh tu’lu’.</p>



<p><strong>axiopeonos/axiopoinos:</strong> noDwI’. <em>sparta</em>Daq pongvam cha’DIch <em>athena</em> chIrgh chenmoHpu’ <em>heracles</em>, <em>hippocoon</em> puqloDpu’Daj je bIjqu’pu’DI’ <em>heracles</em>, <em>oeonus</em> luchotpu’mo’.</p>



<p><strong>basileia:</strong> voDleH.</p>



<p><strong>bulaea: </strong>rIp vay’. <em>athena</em> quvmoHlu’meH, rIp pa’Daq <em>athena</em> Hew tu’lu’.</p>



<p><strong>celeuthia:</strong> taw vay’.</p>



<p><strong>chalcioecus/chalkioikos:</strong> Sorpuq rom’on je juH Qun. <em>sparta</em>Daq Sorpuq rom’on je yughbogh <em>athena</em> chIrgh tu’lu’, chIrghvamDaq baSmeyvam <em>athena</em> Hew tu’lu’, vaj chIrghvammo’ <em>athena</em> pongvam cha’DIch qonlu’pu’, ‘ej <em>sparta</em>Daq <em>athena</em> quvmoHlu’taHvIS, pongvam cha’DIch lo’lu’ je. qaStaHvIS je <em>pausanias</em> poH, taH chIrghvam. chIrghvam chenchoHmoHpu’ <em>tyndareus</em> ngugh net Har, ‘ach qaSpu’pa’ latlh DIS law’, wej chIrghvam naQchoHmoHlu’pu’, ‘ej tagha’ chIrghvam naQchoHmoHpu’ wa’ <em>spartan</em> meHghem chenmoHwI’. <em>gitiadas</em> ‘oH pongDaj’e’.</p>



<p><strong>chalinitis:</strong> Sarghmey tlhay’choHmoHmeH vay’, 
SeHmeH tlheghmey lo’; vay’vam Del pongvam cha’DIch. SarghmeyDaq SeHmeH 
tlheghmey lanbogh vay’ Del je. <em>corinth</em>Daq pongvam cha’DIch <em>athena</em> chIrgh tu’lu’. <em>pegasus</em> tlhay’choHmoHta’ <em>athena</em>, ‘ej ghIq <em>bellerophontes</em>vaD <em>pegasus</em> nobpu’. lutvam qellu’chugh, pongvam cha’DIch yajlu’, ‘ach vabDot lutvam qelbe’lu’chugh, pongvam cha’DIch luQIj <em>athena</em> DI’onmey; yap.</p>



<p><strong>cissaea:</strong> tInchoHtaHbogh ‘arDeH vay’.</p>



<p><strong>cleiduchus: </strong>ngaQHa’moHwI’mey ‘uchbogh vay’. ‘avbogh Qun.</p>



<p><strong>colocasia:</strong> ‘oQqarmey’e’ SoplaHbogh vay’ bop pongvam cha’DIch.</p>



<p><strong>core:</strong> be’Hom, wej tlhoghpu’bogh be’.</p>



<p><strong>coria:</strong> be’Hom, wej tlhoghpu’bogh be’.</p>



<p><strong>coryphagenes:</strong> nachvo’ boghpu’bogh vay’.</p>



<p><strong>coryphasia/koruphasia:</strong> <em>coryphasion</em> puHley’mo’ pongvam cha’DIch qonlu’pu’. pa’ <em>athena</em> lulIgh quv tu’lu’. nach vay’ bop je pongvam cha’DIch.</p>



<p><strong>cranais:</strong> <em>cornel</em> Sor vay’.</p>



<p><strong>cydonia/kudonia:</strong> <em>crete</em> <em>cydonia</em> vay’. <em>elis</em>Daq <em>phrixa</em>Daq <em>athena</em> <em>cydonia</em> chIrgh tu’lu’, ‘ej chIrghvam chenmoHpu’ <em>cydonia</em> <em>clymenus</em> net Har.</p>



<p><strong>cydre:</strong> ngay’ vay’. Dunqu’bogh vay’. chuQun DI’onmey ‘aghbogh vay’.</p>



<p><strong>cyparissia:</strong> <em>messenia</em> <em>cyparissiae</em> vay’. <em>cypress</em> Sor lupochlu’pu’bogh vay’.</p>-- <br><div dir="ltr" class="gmail_signature" data-smartmail="gmail_signature"><div dir="ltr"><div>Dana'an<br></div><div><a href="https://sacredtextsinklingon.wordpress.com/" target="_blank">https://sacredtextsinklingon.wordpress.com/</a><br>Ζεὺς ἦν, Ζεὺς ἐστίν, Ζεὺς ἔσσεται· ὦ μεγάλε Ζεῦ</div></div></div></div>