<div dir="ltr"><p><strong>laphystius/laphustios:</strong> <em>boeotia</em>Daq <em>laphystius</em> HuD tu’lu’, ‘ej HuDvammo’ pongvam cha’DIch qonlu’pu’. ‘ach latlh nger tu’lu’ je; <em>laphussein</em> wotmo’ pongvam cha’DIch qonlu’pu’. tlhoS rap “<em>laphussein</em>” {Haw’} je, vaj Doch rap luDel <em>laphustios</em> <em>phuxios</em>
je. DuH wejDIch tu’lu’ je; qaStaHvIS bov ‘eq, ghaHvaD Human
lu’anmoHlu’mo’, {ghungtaHwI’}/{yonlaHbe’taHwI’} Del pongvam cha’DIch.</p>
<p><strong>larisaeus:</strong> <em>asia</em> <em>minor</em>Daq <em>cayster</em> bIQtIqDaq <em>larissa</em> veng tu’lu’pu’, pa’ <em>zeus</em> chIrgh tu’lu’pu’, vaj pongvam cha’DIch qonlu’pu’.</p>
<p><strong>larissaeus/larissaios:</strong> <em>argos</em>Daq <em>larissa</em> ra’bogh jem’IH tu’lu’pu’. jem’IHvam pongmo’ <em>zeus</em> pongvam cha’DIch qonlu’pu’. <em>apollo</em> pong cha’DIch ‘oH je <em>larissaeus</em>‘e’/<em>larissaios</em>‘e’, ‘ej rap <em>zeus</em> <em>apollo</em> je pongvam cha’DIch mung.</p>
<p><strong>latialis/latiaris/latius:</strong> <em>latium</em>Daq <em>zeus</em> quvmoHlu’pu’mo’, pongvam cha’DIch qonlu’pu’.</p>
<p><strong>lecheates:</strong> boghmoHtaHvIS be’, be’vam Qan pongvam cha’DIch <em>zeus</em>. <em>athena </em>vav ghaH <em>zeus</em>‘e’, ‘ej <em>zeus</em> DI’onvammo’ <em>aliphera</em>Daq <em>zeus</em> <em>lecheates</em> quvmoHlu’pu’.</p>
<p><strong>leuceus:</strong> bochbogh vay’, Dembogh vay’, chISbogh vay’. <em>elis</em>Daq <em>leprium</em>Daq pongvam cha’DIch lo’lu’pu’.</p>
<p><strong>limenoscopus/limenia/limenites/limenitis:</strong> vergh Qanbogh vay’, vergh loHbogh vay’. pongvam cha’DIch lughaj ‘op Qun: <em>zeus</em>, <em>artemis</em>, <em>aphrodite</em>, <em>priapus</em>, <em>pan</em>, latlhpu’ je.</p>
<p><strong>lycaeus/lukaios:</strong> rut pongvam cha’DIch <em>lyceus</em> Sar tu’lu’ je. <em>arcadia</em>Daq <em>lycaeum</em> HuDDaq ‘op Qun luquvmoHlu’pu’, ‘ej pa’ <em>zeus</em> quvmoHlu’pu’ je. HuDvamDaq <em>zeus</em> lulIgh quv tu’lu’pu’, ‘ej pa’ <em>lycaea</em>
yupma’ loplu’pu’. chIrghvam ‘el vay’ net chaw’be’, ‘ej pe’vIl pa’
‘elpu’chugh vay’, qaStaHvIS wa’ DIS, chIrghvam ‘elHa’laHbe’taH nuvvam
‘e’ luHar ‘op, ‘ej QIb ghajbe’choH nuvvam ‘e’ luHar ‘opvam je. ‘a jaS
Har latlhpu’: chIrghvam ‘elpu’bogh vay’ lumuHmeH <em>arcadians</em>, ghaHDaq naghmey lu’vo’, pagh ghaHvaD <em>stag</em> pongchoHlu’, ‘ej toD’eghmeH nuvvam, Haw’nIS. Hochvam luHar latlhpu’vam. <em>lycaeon</em> HuDDaq boghpu’mo’ <em>pan</em>, ‘ej pa’ wa’ lulIghDaj quv tu’lu’pu’mo’, <em>lycaean</em> pong cha’DIch ghaj je <em>pan</em>. <em>apollo</em> pong cha’DIch ‘oH je <em>lycaeus</em>‘e’.</p>
<p><strong>maemactes/maimaktes:</strong> ngIjbogh vay’, jevbogh vay’. chaq <em>maemacterium</em> ‘elaDya’ jar pong ‘oH pongvam cha’DIch mung’e’, chaq pongvam cha’DIch ‘oH <em>attica</em> jar <em>maemacterion</em> mung’e’. ‘a latlh nger tu’lu’ je; ‘elaDya’ mu’ <em>maemactes</em> ‘oH pongvam cha’DIch mung’e’. rap <<em>maemactes</em>> {QeH} wot je. <em>athens</em>Daq <em>zeus</em> quvmoHlu’taHvIS, pongvam cha’DIch lo’lu’pu’ je, ‘ej <em>zeus</em> quvmoHlu’taHvIS, pongvam cha’DIch lo’lu’chugh, ghaHvaD rewve’ Qun Damlu’. vaj jevbe’meH, ‘ej qaSbe’meH qImroqmey qab, ngugh <em>zeus</em> rItlu’. qaStaHvIS <em>maemacterion</em> jar, <em>athens</em>Daq <em>maemacteria</em> luloplu’.</p>
<p><strong>mechaneus:</strong> ‘oghbogh vay’, vItlhbogh ‘oghmeH
laH ghajbogh vay’, jallaHbogh vay’. wa’ mu’ ‘oH pongvam cha’DIch
mung’e’, ‘ej rap mu’vam {Ho’DoS} {SommI’} je. <em>zeus</em>vaD jInmolmey/Qu’mey/ngoQmey Qatlh turchoHbogh nuvpu’ QanwI’ le’ Damlu’mo’ je, pongvam cha’DIch qonlu’pu’. <em>argos</em>Daq <em>zeus</em> pongvam cha’DIch lo’lu’pu’ je. ‘ach pongvam cha’DIch latlh Sar tu’lu’ je, ‘ej be’ chaHbogh Qun’e’ luDellu’meH, Sarvam lo’lu’; <em>mechanitis</em> ‘oH pongvam cha’DIch’e’. <em>megalopolis</em>Daq <em>aphrodite</em> quvmoHlu’taHvIS, pongvam cha’DIch lo’lu’pu’ je, ‘ej <em>athena</em> pong cha’DIch ‘oH je <em>mechanitis</em>‘e’.</p>
<p><strong>meilichius/meilichios/milichius:</strong> DochHa’bogh
nobbogh ‘ej varHa’bogh Qun; Qun jotchoHmoHbogh Qaghpu’bogh vay’, ‘ej
Qaghpu’bogh vay’vaD jup mojqa’laHbogh Qun. ‘op Qun pong chaDIch ‘oH <em>meilichius/meilichios</em>‘e’: 1. <em>zeus</em> pong cha’DIch ‘oH. Qaghpu’chugh nuv, vaj <em>zeus</em> jotchoHmoHmeH, ‘ej <em>zeus</em>vaD jupDaj mojqa’moHmeH, <em>zeus</em> quvmoH neHchugh, ‘ej <em>zeus</em>vaD ‘anmoHchugh, nuvvam Qan <em>zeus</em>. Hoch DIS <em>athens</em>Daq <em>zeus</em>vaD <em>cakes</em> lunoblu’pu’, qaStaHvIS <em>diasia</em> yupma’. <em>cephissus</em>Daq <em>sicyon</em>Daq <em>argos</em>Daq je <em>zeus</em> <em>meilichius/meilichio</em>s ‘anmoHmeH qachHom luchenmoHlu’pu’. 2. <em>naxos</em> ‘ambayDaq <em>dionysus</em> pong cha’DIch ‘oH je <em>meilichius/meilichios</em>‘e’. 3. <em>tyche</em> pong cha’DIch ‘oH je <em>meilichius/meilichios</em>‘e’.</p>
<p><strong>meli</strong><strong><em>s</em></strong><strong>saeus:</strong> <em>bees</em> bopbogh vay’. puq ghaHtaHvIS <em>zeus</em>‘e’, luQorgh <em>amaltheia</em>, latlh <em>nymphs</em> je. be’nI’ chaH <em>amaltheia</em>‘e’ <em>melissa</em>‘e’ je, ‘ej <em>melissa</em> ‘oH <em>zeus</em> pongvam cha’DIch mung’e’.</p>
<p><strong>messa:</strong> botlh.</p>
<p><strong>messapeus/messapeos:</strong> <em>laconia</em>Daq <em>taygetus</em> HuD jaHmeH vay’, wa’ taw lo’. puH beQDaq tawvam tu’lu’, ‘ej puHvam beQ wa’ yoSDaq <em>zeus</em> pongvam cha’DIch lo’lu’pu’ je. <em>zeus</em> toy’pu’bogh wa’ maqlegh pong ‘oH pongvam cha’DIch mung’e’.</p>
<p><strong>metieta:</strong> qeSbogh vay’, Hoch Sovbogh vay’.</p>
<p><strong>metis:</strong> rut <em>orpheus</em> ghItlhmeyDaq <em>zeus</em> pongvam cha’DIch lo’lu’ je.</p>
<p><strong>moiragetes:</strong> San SeHbogh vay’. <em>delphi</em>Daq <em>zeus</em> <em>apollo</em> je pong cha’DIch ‘oHpu’ je <em>moiragetes</em>‘e’.</p>
<p><strong>morius:</strong> <em>olive</em> Sor Qanbogh vay’. <em>athena</em> Sor quv ‘oH <em>olive</em> Sor’e’</p>
-- <br><div dir="ltr" class="gmail_signature" data-smartmail="gmail_signature"><div dir="ltr"><div>Dana'an<br></div><div><a href="https://sacredtextsinklingon.wordpress.com/" target="_blank">https://sacredtextsinklingon.wordpress.com/</a><br>Ζεὺς ἦν, Ζεὺς ἐστίν, Ζεὺς ἔσσεται· ὦ μεγάλε Ζεῦ</div></div></div></div>