<div dir="ltr"><p><strong>abrettenus/abretanus</strong>: <em>mysia</em>Daq <em>zeus</em>vaD <em>abrettenus</em>/<em>abretanus</em> ponglu’pu’.</p>



<p><strong>acraeus (akraios)</strong>: ‘op Qun tu’lu’, ‘ej HuDmeyDaq chIrghmeychaj tu’lu’pu’. <em>zeus</em>, <em>hera</em>, <em>aphrodite</em>, <em>pallas</em>, <em>artemis</em>, latlhpu’ je chaH Qunvam’e’. <em>acraeus</em> (<em>akraios</em>) ‘oH wa’ Qunpu’vam pong cha’DIch’e’.</p>



<p><strong>aegiochus</strong>: <em>aegis</em> ‘uchbogh vay”e’. <em>zeus</em> <em>athena</em> je gha’cher DIr yoD ‘oH <em>aegis</em>‘e’, ‘ej reH poymar ‘oH yoDvam’e’. <em>kronos</em> jeypu’DI’ <em>zeus</em>, chalmeyDaq Salpu’ <em>zeus</em>, ‘ej pa’ SaltaHvIS, gha’cher be’ lIghtaH. tera’Daq woQ Suqpu’ wa’ <em>zeus</em> loDnI’ (<em>plouton</em>), ‘ej bIQ’a’Daq woQ Suqpu’ latlh <em>zeus</em> loDnI’ (<em>poseidon</em>).</p>



<p><strong>aegyptius</strong>: maSIrDaq <em>zeus</em> quvmoHlu’taHvIS, <<em>aegyptius</em>> ‘oH pongDaj cha’DIch’e’.</p>



<p><strong>aeneius/aenesius</strong>: <em>cephalenia</em> ‘ambayDaq HuD <em>aenos</em>Daq <em>zeus</em> chIrgh tu’lu’pu’; pa’ <em>zeus</em> quvmoHlu’taHvIS, <em>aeneius</em>/<em>aenesius</em> ‘oH pongDaj cha’DIch’e’.</p>



<p><strong>aeolomorphus</strong>: tu’qomDaj choHlaHbogh vay”e’.</p>



<p><strong>aether/ether</strong>: <em>zeus</em> lupongmeH ghuQ chenmoHwI’, pongvam lulo’pu’. <em>aeschylus</em>, ‘ay’ SochmaH: ><em>aithir</em> ghaH <em>zeus</em>‘e’, tera’ ghaH <em>zeus</em>‘e’, chal ghaH <em>zeus</em>‘e’, yIqawtaH, Hochvam ghaH <em>zeus</em>‘e’, ‘ej <em>zeus</em> Dun law’, Hochvam Dun puS.< <em>euripides</em>, ‘ay’ chorghvatlh SochmaH Soch: >bItlhoghpu’be’bogh be’, DuboghmoHpu’ <em>aithir</em>; <em>aithir</em>vaD <em>zeus</em> pong Human Segh.< <em>orpheus</em> <em>zeus</em> van bom, <em>orpheus</em> ‘ay’ wa’vatlh javmaH chorgh, yamtaw mu’tlhegh wa’maH Soch: >vItna’ ‘oH yabDaj’e’, jubbogh <em>aithir</em>.< <em>aithir</em> ‘oH <em>zeus</em> mung’e’ ‘e’ Del <em>orpheus</em> Qun mung lut.</p>



<p><strong>aethiops</strong>: wewbogh vay’, qIjbogh vay’. <em>chios</em> ‘ambayDaq <em>zeus</em> quvmoHlu’taHvIS, pa’ <em>zeus</em> pongvam cha’DIch lo’.</p>



<p><strong>aetnaeus</strong>: <em>aetna</em> HuD tu’lu’, ‘ej rarchuq ‘op Qun, ‘op wIch jeSwI’, HuDvam je. rarchuq je <em>zeus</em> HuDvam je, ‘ej <em>aetnaeus</em> ‘oH Hochvam pong cha’DIch’e’. <em>aetna</em> HuDDaq <em>zeus</em> Hew tu’lu’pu’, ‘ej pa’ <em>zeus</em> quvmoHlu’meH, yupma’ cherlu’pu’. yupma’vamvaD <em>aetnaea</em> ponglu’.</p>



<p><strong>agamemnon</strong>: <em>sparta</em>Daq <em>zeus</em> quvmoHlu’taHvIS, pongvam cha’DIch lo’lu’. rurchuqmo’ <em>zeus</em> <em>agamemnon</em> je, pongvam cha’DIch lo’choHlu’pu’ ‘e’ ‘Ir <em>eustathius</em>, ‘a nger pIm luHar latlh: taHtaHbogh vay’ Del pongvam cha’DIch ‘e’ luHar latlhvam, {<em>agan</em>} {<em>menon</em>} je mu’ yughmo’ <em>agamemnon</em>.</p>



<p><strong>agathodaemon</strong>: Qun<em> </em>QaQ. Soppu’DI’ 
‘elaDya’nganpu’, Qunvam luquvmoHmeH, wa’ HIvje’ ghIrep vIychorgh 
roghlu’pu’bogh lutlhutlh, ‘ach vIychorghvam luDuDpu’be’. <em>arcadia</em>Daq <em>megalopolis</em> <em>maenalus</em> je rarbogh taw’e’ tu’lu’, ‘ej <em>agathodaemon</em> quvmoHlu’meH, pa’ wa’ chIrgh chenmoHlu’pu’. zeus napbogh pong cha’DIch ‘oH <em>agathodaemon</em>‘e’ ‘e’ ‘Ir <em>pausanias</em>, ‘ach vuDDaj toblaHpu’be’.</p>-- <br>Dana'an<br><a href="https://sacredtextsinklingon.wordpress.com/">https://sacredtextsinklingon.wordpress.com/</a><br>Ζεὺς ἦν, Ζεὺς ἐστίν, Ζεὺς ἔσσεται· ὦ μεγάλε Ζεῦ</div>