<div dir="ltr"><p>vaj porgh Say’ bop lam’a’, ‘ach jaSHa’ Qunpu’ cholmeH laH bop je. 
‘elaDya’ lalDan turwI’pu’ Hoch jaj yIn SIgh ‘elaDya’ lalDan; ‘ej qo’vam 
jemtaHghach luSIgh Say’taHghach lam’a’ je. vaj ‘elaDya’ lalDan 
turwI’pu’vaD qo’vam jemtaHghach SIghchu’ ‘elaDya’ lalDan, ‘ej tagha’ 
lalDan qo’ lujemchoH ‘elaDya’ lalDan turwI’. nItwI’pu’ (Qunpu’) qo’ 
lunaw’meH nuvpu’, ‘ej nuvpu’vaD lam’a’ ngejmoHpu’DI’ Hoch jaj yIn, 
nIt’eghchoHmoH nuvpu’ chaHvaD ‘e’ poQ ‘elaDya’ lalDan. Qunpu’ qo’ naw’ 
vuS ‘ej SIgh nItchoHmeH mIw; lam’a’ luqaSmoH boghmoHmeH mIw, Hegh, 
chImeH mIw, ‘op Soj, ngaghmeH mIw je. vaj Say’nIStaH/nItnIStaH nuv qa’, 
yab, porgh je, ‘ej Hochvam nItHa’moHbogh Hoch junnISchu’ nuv. vatlh DIS 
poH loSDIch <em>cyrene</em>Daq, Dorbogh vatlh DIS poH cha’DIch <em>delos</em>Daq, vatlh DIS poH wejDIch <em>ledos</em>Daq je be’ ngaghchugh loD, qoj boghmoHbogh be’ cholchugh loD, nItHa’choH loDvam; <em>cyrene</em>Daq tlhoghpu’DI’ be’, ‘annISmoH vay’. motlh <em>delos</em>Daq
 be’pu’mo’ qaS lam’a’; nItHa’moH chIbogh be’pu’, ‘ej nItHa’moH je 
yatlhbogh be’pu’, ‘ej yatlhtaHvIS, Hegh ghuchaj. ‘ach nItHa’moH je 
mu’tlhegh meSvamDaq Hoch latlh Dellu’pu’bogh, ‘ej nItHa’moH je ghotI’ 
luSoplu’bogh, Suy’ luSoplu’bogh je <em>delos</em>Daq net Har. DaH latlh jatlhnISlu’ je: nItHa’moHlaH be’pu’, ‘ach nItHa’moHlaH je loDpu’ <em>lindos</em>Daq <em>cyrene</em>Daq net Har je. vaj Heghpu’bogh tuqnIghDaj (loDpu’ be’pu’ joq) cholpu’chugh vay,’ qay’ <em>lindos</em>Daq <em>cyrene</em>Daq net Har.</p>



<p>DaH ghellaH vay’: < Qunpu’ quvmoHchoHpa’ nuv, chay’ 
nIt’eghnISmoH? nuq ‘oH mIw’e’ pabnISbogh? > wa’DIch, -tay lopchoHpa’ 
nuv, Daq nIt ‘elpa’, chIrgh cholpa’, ‘anmoHmeH qachHom SumchoHpa’- 
porghDaj Say’moHmeH, HaH’eghnIS. ‘ach tay nItchu’ghach chavqangbejchugh 
nuv, yapbe’; <em>khernips</em> chennISmoH ‘ej lo’nIS nuv. bIQ nIt ‘oH <em>khernips</em>‘e’,
 ‘ej Daqmey nIt (‘anmoHmeH qachHom, chIrgh Daqmey Sum) ‘elpa’ nuv, 
ghopDu’Daj qabDaj je Say’moHmeH nuv, bIQvam nIt lo’nIS, ‘ej bIQvam nIt 
lo’taHvIS, mIw SeQ pabnIS; Hoch Sar tay lopchoHpa’ nuv, bIQvam nIt lo’ 
net poQ. <em>khernips</em> chenmoHlu’meH, cha’ nItmoHmeH qurme’ 
lulo’lu’: qul bIQ je. roD nItmoHbogh qurme’ bIH qul’e’ bIQ’e’ je net 
Sov, ‘ej Say’choHmoHmo’ pIvchoHmoHmo’ ‘ej nItchoHmoHmo’ qul, potlhchu’ 
qul..</p>



<p>ngeD <em>khernips</em> chenmoHmeH mIw; vabDot juHDaq ghaHtaHvIS 
vay”e’, bIQvam nIt chenmoHlaH. mIw: maHpInDaq bIQ lan nuv; bIQ’a’ bIQ, 
ghItbogh bIQ (ghantoH: bIQtIq bIQ) ghap ‘oHchugh bIQvam’e’, qaq. ‘ach 
chaq Sarvam bIQ SamlaHbe’ nuv, vaj juHDajDaq qutmey na’, bIQ motlh je 
DuDlaH, ‘ej bIQvam lo’laH, pagh bIQ SeHjan bIQ motlh neH lo’laH. ghIq 
bIQ DungDaq meQchoHmeH San’emDerHom(mey) (lu)QaDlu’pu’bogh, 
San’emDerHom(mey)vamDaq qul chu’. San’emDerHom(mey)vam SamlaHbe’chugh 
nuv, jaSHa’ lalDan tlhIch Hap lo’laH, pagh por bartIqHom ghap 
QeDlu’pu’bogh lo’laH je. Hochvam meQchoHmoHpu’DI’ nuv, qul chu’Ha’meH, 
maHpIn bIQDaq vay’vam meQchoHmoHpu’bogh ‘oqmoH, ‘ej vay’vam 
‘oqchoHmoHtaHvIS nuv, jatlh < yInItchoH >. ghIq Say’eghmoHmeH nuv,
 bIQvam lo’choH; wa’DIch ghopDu’Daj Say’moH, ghIq qabDaj Say’moH, ‘ej 
Say’eghmoHmeH nuv, jatlhlaH < jISay’eghmoHmeH, bIQ nIt vIlo’ >. 
ghIq tay DaqDaq tay jeSwI’pu’Daq je bIQvam nIt ghay nuv, jatlhtaHvIS < naDevvo’ peghoS, Hoch qa’pu’ mIgh >, pagh < naDevvo’ peghoS 
peghoS, nItHa’wI’ >.<br></p><p>-- <br></p>Dana'an<br><a href="https://sacredtextsinklingon.wordpress.com/">https://sacredtextsinklingon.wordpress.com/</a><br>Ζεὺς ἦν, Ζεὺς ἐστίν, Ζεὺς ἔσσεται· ὦ μεγάλε Ζεῦ</div>