<html>
<head>
<meta http-equiv="Content-Type" content="text/html; charset=UTF-8">
</head>
<body>
<p><i>Frigg:</i> Odin be'nalna', Balder SoS. Balder SaHqu'. ghaH
toy' Gna, Fulla je. be' nen, SoS je rur tu'qomDaj.</p>
<p><i>Fulla:</i> Frigg toy' ghaH, be' Qun law' je.</p>
<p><i>Fylgjur (wa' Fylgja):</i> ghojmoHbogh be' Qunpu'. rurchuq
Hoch. HumanvaD De' ghuH joq QumlaH. wa' ghaj Hoch Human. Heghchugh
Fylgja, tugh tlha' ghotDaj. Heghpa' Human, Qobqu'DI' ghu', pIj
FylgjaDaj legh Humanvetlh. motlh Ha'DIbaHÂ tu'qom legh (tera'
mIl'oD, tera' ngavyaw', toQ, ghargh, latlh). rut Human tu'qom tuQ;
ngugh nuH qengbogh Valkyries rur.</p>
<p><i>Gerd:</i> Frey be'nal; ghaH SawmeH, Qatlh qaD. be' Qunpu''e'
tlhoS ghaH 'IH law' Hoch 'IH puS.</p>
<p><i>Gna:</i> latlh Frigg toy'wI'. QInmey qem 'ej ghaHvaD tey'
Frigg.</p>
<p><i>Heimdall:</i> Asgard 'avwI'. tuch rIt. Human Segh vav ghaH.
Loki jagh ghaH; not jegh. gheb SuSlu'bogh 'oH DeghDaj'e'.</p>
<p><i>Hel:</i> Loki puqbe'. ghe''or Niflheim 'av. rut NiflheimvaD
Hel ponglu'. Heghpu'chugh qa' 'ej Valhalla, latlh Daq le'
jaHbe'chugh, qa' pol Hel.<br>
</p>
<pre class="moz-signature" cols="72">--
SuStel
<a class="moz-txt-link-freetext" href="http://trimboli.name">http://trimboli.name</a></pre>
</body>
</html>