<html>
<head>
<meta http-equiv="Content-Type" content="text/html; charset=UTF-8">
</head>
<body>
<div class="moz-cite-prefix">On 10/30/2020 4:21 PM, mayqel qunen'oS
wrote:<br>
</div>
<blockquote type="cite"
cite="mid:lopbuq8jjcomt780j4rqgenk.1604088124499@email.android.com">
<meta http-equiv="content-type" content="text/html; charset=UTF-8">
<style type="text/css">
<!--
div#d_1604089289112 p {font-family:; font-size:9.0pt; color:#000000}
-->
</style>
<div id="d_1604089289112" style="font-family:; font-size:9.0pt;
color:#000000">'a wejvam'e' baseball 'oH poymarna''e'..
qaStaHvIS yInwIj Hoch, jISIv:
<br>
<p dir="ltr" style="margin-top:0; margin-bottom:0;">boqwI'
chaH'a' jeqqIj 'uchbogh nuv'e' pogh tuQbogh nuv'e' je ??? 'ej
'Iv ghaH QujmeH moQ vo'bogh nuv boqwI''e' ???</p>
<br>
<p dir="ltr" style="margin-top:0; margin-bottom:0;">chaq not
jISov.. tuch - yo' qIjDaq jIHtaHvIS - qaStaHvIS Hoch poHmey,
mumISmoH poymarvam..</p>
</div>
</blockquote>
<p>Hut <i>inning</i> yugh <i>baseball</i> Quj. <i>poHHom </i>vIpong.
taghDI' poHHom, <i>fielders</i> 'oH wa' ghom'e' 'ej <i>at bat</i>
'oH latlh ghom'e'. <i>moQ raQwI', jeqqIj QachwI'</i> je vIpong.
moQ mupDI' QachwI', <i>qetwI'</i> moj. yotlhDaq wej waw' tu'lu':
waw' wa', waw' cha', waw' wej. latlh waw' rurbogh Daq tu'lu': juH
ponglu'. yotlh botlhDaq Qam <i>pitcher;</i> <i>chuHwI'</i>
vIpong. juHDaq Qam tlhurwI'. Hoch waw'Daq Qam raQwI'. waw' cha'
waw' wej jojDaq Qam <i>shortstop; </i>raQwI'vamvaD pong
vIghajbe'. waw'mey HayDaq Qam wej raQwI': Hay nIH, Hay poS, Hay
botlh.</p>
<p>juHDaq Qam QachwI'. tlhurwI'vaD moQ chuH chuHwI'. Qachchugh
QachwI' 'ej moQ mupbe'chugh, QachHa'ghach baj. mupchugh 'ach yotlh
Hur jaHchugh moQ 'ej wej cha' QachHa'ghach bajpu'chugh,
QachHa'ghach baj. wej QachHa'ghach bajchugh QachwI', lujpu' ghaH
'ej QachchoH latlh QachwI'.</p>
<p>moQ mupchugh QachwI' 'ej yotlh jaHchugh 'oH, qetwI' moj QachwI'
'ej waw' wa'Daq qet. moQ 'uchlaHchugh waw wa' raQwI', pawpa'
qetwI', lujpu' qetwI' 'ej ghom cheghnIS. waw' wa'Daq pawchugh
qetwI', waw' cha'Daq qetlaH, 'ach qetwI' Hotchugh moQ ghajbogh
raQwI', lujpu' qetwI'. Hoch waw' HotnIS qetwI', ghIq juHDaq
qetlaH. juH pawchugh qetwI', Qapla' baj ghom.</p>
<p>waw' wa'Daq ratlhchugh qetwI' 'ej latlh moQ mupchugh QachwI'
chu', qetnIS qetwI'; waw'Daq QamlaH wa' qetwI' neH. waw'
ghoSnISchugh qetwI' 'ej 'oHDaq Qamchugh moQ 'uchbogh raQwI',
lujpu' qetwI'.</p>
<p>wejlogh lujpu'DI' ghom, raQwI' moj QachwI' 'ej QachwI' moj
raQwI'. wejlogh lujpu'DI' Hoch ghom, mev poHHom. mevDI' Hut
poHHom, mev Quj.</p>
<p>latlh chut tu'lu'. chut nap neH vIDelpu'. waw' nIHlaH qetwI'.
qetwI'vaD juH pawmoHmeH, pe'vIlHa' muplaH QachwI' 'ej
'an'eghmoHlaH. chuHHa'chugh chuHwI', <i>ball</i> baj QachwI' 'ej
loS <i>ball</i> bajchugh, waw' wa'Daq yIt chaw'lu'.<br>
</p>
<p>pIj <i>baseball</i> luyajbe' <i>Europe</i>ngan. QIt Qujlu'.
mupDI' QachwI', nom Qujlu' 'ach mevDI' moQ, leS Hoch. Quj
bejlu'taHvIS, QujwI' Dup to' je lurIchlu'. QujwI' lurIchlu'. Soj
'ey Soplu'. leSmoH <i>baseball</i> 'ej SeymoH.<br>
</p>
<pre class="moz-signature" cols="72">--
SuStel
<a class="moz-txt-link-freetext" href="http://trimboli.name">http://trimboli.name</a></pre>
</body>
</html>