<div dir="auto"><div dir="auto">melkor po'wI' ghelta' taghwI'..</div><div dir="auto"><br></div><div dir="auto">qatlh potlh yInvam ?</div><div dir="auto"><br></div><div dir="auto">potlhbe' yInvam.. jatlhta' po'wI', jangtaHvIS.</div><div dir="auto"><br></div><div dir="auto">HIQoy taghwI', jatlhta' je; wa' jaj van yInvam. Hoch chargh Hegh, 'ej Sanvam narghlaH pagh. 'a, vanDI' yInvam lo'laHbe', ghIq tagh wa' latlh DI'ruj, 'ej not van DI'rujvam. DI'rujvam Da'eltaHvIS, Dutlhej qa'lIj neH, nItlhej tIqlIj DI'onmeyna' neH, vaj DI'rujvam Da'eltaHvIS watlhbe'chugh qa'lIj, joHma' ngay' DaSIQlaHbe'..</div><div dir="auto"><br></div><div dir="auto">potlh yInvam 'e' luHar pujwI'pu'. 'e' luHar nururbe'bogh nuvpu'.. 'ej mujchu' nuvpu'vam. ramchu' yInvam, 'a potlhchu' wa' yInvam ngoQ; 'ej ngoQvam'e' potlh law' Hoch potlh puS: </div><div dir="auto"><br></div><div dir="auto">qa'lIj DaHurghnISchoHmoHchu'; qa'lIjvaD melkor ngay' SIla' DamojnISmoH.. qa'lIjvaD melkor ngay' DatlhuDnISmoHtaH. ngoQvam DachavmeH joHma' pong DarItnIStaH, 'a vabDot jaSHa' bIvangchugh yapbe'.</div><div dir="auto"><br></div><div dir="auto">joHma' ngay' DatlhuDmeH, Say'nISchu' tIqlIj; 'ej Say'chu'meH tIqlIj, Hurghchu'ghach DaghepnIS, 'ej Hoch yutbogh Dochmey DalonnIS. yIqawtaH ! qul qo' Da'eltaHvIS, nItlhej pagh qo'vam Dochmey; vaj qo' Qav Da'elpa', chIch qo'vam Hoch DalonnISchu'pu'.</div><div dir="auto"><br></div><div dir="auto">not yIlIj taghwI'.. bI'reS 'oH Hegh'e'; vanmeH wanI' 'oHbe'bej Hegh'e'; lojmIt'a' 'oH Hegh'e', 'ej lojmIt'a'vam DachIqpu'DI', ngugh tagh yInna'. 'a yInna'vam DaSIQlaHmeH mItnISchoHpu' qa'lIj, naDev bIyIntaHvIS.</div><div dir="auto"><br></div><div dir="auto">Hegh lojmIt'a'Daq bIQamchoHpu'DI', pagh 'eb cha'DIch tu'lu'. vaj yImIt'eghchoHmoH..</div><div dir="auto"><br></div><div dir="auto">~ mayqel qunen'oS</div></div>