<div dir="auto"><div dir="auto" style="font-family:sans-serif">lo'wI'pu'DajvaD, Qaw'meH laHmey noblaH Dop Hurgh. 'ej lo'wI'pu'DajvaD Sar rap laHmey noblaH je Dop wov. laHvam lupatlhmoHlu', vaj tugh tlhoj: Dop Hurgh laHmey HoSghaj law' Dop wov laHmey HoSghaj puS. 'a latlh Sar laHmey tu'lu', 'ej ngoQvam nIv Dop wov.. vormeH laH bIH laHmeyvam'e'..<br></div><div dir="auto"><br></div><div dir="auto">pIv'eghqa'moHlu'meH 'ej porghDaj tI'lu'meH, Dop wov lo'laH vay'. ngoQ rap luchavlu'meH Dop Hurgh lo'laH je vay'. 'a Dop Hurgh lo'lu'chugh, 'ej tagha' ngoQvam luchavlu', vaj qaStaHvIS poH ngaj neH taH tev. chIch Dop Hurgh lo'lu'taHvIS, (qaStaHvIS wanI'vam neH), QaplaH Dop Hurgh vormeH HoSmey. rop vorlu'meH Dop Hurgh lo'lu'chugh, 'ej Qap, Dop Hurgh lo'be'choHlu'DI', vaj qaSqa' rop.</div><div dir="auto"><br></div><div dir="auto">povbogh ghantoH law' tu'lu'; 'ej *darth bane* *darth vader* je Dop Hurgh vormeH laHmey bIH cha' ghantoH'e'. ghaH HoHlaHbogh tar'e' 'ommeH *darth bane*, latlhpu' 'oy' bep je lo'. HoS'eghmoHmeH *bane* latlhpu' 'oy' bep je lo', 'a tagha' vor'eghchu'meH vorwI' *caleb* boQ poQ *bane*.</div><div dir="auto"><br></div><div dir="auto">taghDu'Daj vormeH *darth vader*, Dop Hurgh lo'; 'ej taghDu'Dajvo' Heghbogh tagh 'ay'mey lellaH. vaj tagha', yIntagh lo'nISbe'. 'a chavvam leHtaHmeH, Dop Hurgh buSnISchu'taH. pay' buSbe'choHchugh, qoj pay' muSbe'choHchugh, vaj SIbI' rIQqa' taghDu'Daj.</div><div dir="auto"><br></div><div dir="auto">'ej *darth sion* ghantoH tu'lu' je.. Dop Hurgh vormeH laHmey lo' chIwchu' *darth sion* ghantoH. Dop Hurgh HoSna' chIw ghantoHvam; 'a Dop Hurgh pujna' chIw je..</div><div dir="auto"><br></div><div dir="auto">*sion* porgh ghorlu'ta', 'ej Heghlaw' porghDaj; *sion*vaD 'oy'taH porghvam. vaj, porghDaj mutlhqa'meH *sion*, 'ej qIvonDu'Daj HumchuqmoHmeH *sion*, Dop Hurgh HoS lo'; 'ej Dop Hurgh HoS je'meH *sion*, 'oy''a'Daj lo'taH: 'oy''a'vammo', QeHqu'laHtaH, 'ej QeHqu'choHtaHvIS ghur HoSDaj. ghIq, HoSvammo', rIQqu'choHtaHvIS taHlaH *sion*. Dop Hurgh SIr'o'Daq SumchoHchugh *sion*, HoHlaH paghHey. 'a, tagha' QeH'a'Daj lonmeH *sion*, pon *meetra surik*. 'ej *sion* ponta'DI' *surik*, SIbI' Dej *sion* porgh 'ej Hegh.</div><div dir="auto"><br></div><div dir="auto">********</div><div dir="auto"><br></div><div dir="auto">nom wa' porgh pIvqa'laHmoH Dop wov, 'ej ngoQvam chavlu'ta'DI', Hochlogh ratlhlaH wanI'vam. 'a Dop Hurgh lo'wI'pu' puS tu'lu' (pIv'eghqa'moHlaHbogh nuvpu'), 'ej pIvqa'DI' nuvpu', qaStaHvIS yInchaj Hoch pIvlaHtaH.</div><div dir="auto"><br></div><div dir="auto">*count dooku* ghaH wa' ghantoH'e'; porghDajvo', ghaH ngejbogh nuH'e' lellaH. *dooku*vaD nuHvam ngejmoH *jango fett*, SutlhtaHvIS *dooku* *fett* je, 'ej *dooku* raDmeH *fett*, vang.</div><div dir="auto"><br></div><div dir="auto">wa' latlh ghantoH tu'lu'; *darth plagueis*. *plagueis* lurIQmoHta' *maladian* HoHwI'; lurIQmoHta' 'ej ghIq qaS maH law' DIS. qaSpu' poHvam, 'a pIv'eghqa'moHmeH *midichlorian*mey SIghlaH *plagueis*, vaj tagha' tlhoS vor'eghlaHchu'. </div><div dir="auto"><br></div><div dir="auto">'a, DaH wa' ngoD potlh wIqelnIS; Dop Hurgh HoS lo'be' mIw'e' lo'ta'bogh *plagueis*, 'ej mIwvam lo'laH *plagueis* neH. 'ej chaq vor'eghtaHvIS *dooku*, Dop Hurgh lo'be', 'ej ngoQvam chavmeH chaq *jedi* SovDaq lo'.</div><div dir="auto"><br></div><div dir="auto">~ nI'ghma</div></div>