<html>
<head>
<meta content="text/html; charset=windows-1252"
http-equiv="Content-Type">
</head>
<body bgcolor="#FFFFFF" text="#000000">
<div class="moz-cite-prefix">On 12/13/2016 1:02 PM, mayqel qunenoS
wrote:<br>
</div>
<blockquote
cite="mid:CAP7F2cJfEwjzA8YKZZBJpmLMidvKjN_h7GJrKcukyD_0KbESCQ@mail.gmail.com"
type="cite">
<pre wrap="">ngechDaq lIghtaHvIS chaH, ghel gimli: Daqvam chImDaq yInlaH mangghoH
Sar nuq; 'ej jang legolas: mangghom mIgh.. ghIq QIjchoH:
poH nI' ret, gondor ta' QavvaD lay' HuD'a' loDpu': luQaHmeH pawqang
'ej Suv. 'ach lIbchoHDI' Qob'a' 'ej QaH SuqnIschu' gondor, Haw' chaH..
HuD'a' QIbmeyDaq ngab. vaj roj luSuqlaHbe'meH chaH qIch isildur.
'Ipchaj luquvmoHDI', qaSDI' wanI'vam'e' neH, ghanHa'qa'laH qa'chaj.
choS QIbmeyvo' rItlaH 'Iv. nuvpu''e' lIjbogh Hoch..
loD cho'wI' neH.. loDvaD lay'ta'bogh chaH. northvo' paw. raD Qob'a'.
lojmIt'a' vegh, HeghwI'pu' tawmey 'el..</pre>
</blockquote>
<br>
<p><i>Peter Jackson</i> lut Daja'qa'; ghu'vam vIlughnISmoH 'ej <i>Tolkien</i>
mu' nIv vImugh:</p>
<blockquote>
<p>«Heghpu'wI' taw!» jatlh <i>Gimli.</i> «ghIj pongvetlh 'ej
parba' <i>Rohan</i>ngan. rurbogh taw lulo'chugh yInwI'
taHlaH'a'? vabDot tawvetlh boveghchugh, chay' <i>Mordor</i> HIv
bot puSqu'wI'?»</p>
<p>«not tawvetlh lulo' yInwI' puHvam luDabchoHtaHvIS <i>Rohan</i>ngan»
jatlh <i>Aragorn, </i>«chaHvaD ngaQmo'. 'ach poHvam mIgh 'oH
lo'laH <i>Isildur</i> tuqnIgh, ngIlchugh. peQoy! <i>Rivendell</i>vo'
vavDaj QIn muqempu' Sov pIn'a' <i>Elrond</i> puqloDpu'; ja' <i>AragornvaD
</i><i>tuch ja'wI' mu'</i> <i>tIqawmoH, Heghpu'wI' taw tIqawmoH
je.</i>»</p>
<p>«'ej nuq ja' tuch ja'wI'?» jatlh <i>Legolas.</i></p>
<p>«jatlh <i>Malbeth</i>, tuch ja'wI', che'taHvIS <i>Arvedui,</i>
<i>Fornost</i> ta' Qav» jatlh <i>Aragorn:</i></p>
<blockquote>
<p>puH vel QIb tIq,<br>
'ev tIngDaq SIchlI'bogh tel rur.<br>
Qom chalqach; ta' lom qachmeyDaq<br>
chollI' San. vem Heghpu'wI';<br>
DaH lay'Ha'wI' poH 'oH:<br>
<i>Erech</i> naghDaq Qamqa' chaH<br>
'ej pa' HuDDaq gheb rIl 'e' Qoy.<br>
gheb rIl 'Iv? qIjbogh choSvo' 'ej wovbogh<br>
ghot'e' lIjlu'pu'bogh rIt 'Iv?<br>
'Ip lulay'bogh HevwI' tuqnIgh.<br>
'ev chan 'evvo' paw, ruchmoH 'utchu'ghach:<br>
Heghpu'wI' taw lojmIt vegh.</p>
</blockquote>
<p>«Hurghbej taw» jatlh <i>Gimli,</i> «'ach taw Hurgh puS bom
mu'vam Hurgh puS.»</p>
<p>«SovlIj Daghur DaneHchugh HItlhej» jatlh <i>Aragorn;</i> «DaH
tawvetlh vIghoS. jImej 'ach jIQuchbe'; jImejnISqu' neH. vaj
bIghoSchugh bIghoSqang 'e' vIpoQ. bIghoStaHvIS bIvumqu' 'ej
DaghIjqu'lu'. qabqu'.»</p>
<p>«vabDot Heghpu'wI' tawDaq qatlhejchu'.» jatlh <i>Gimli.</i></p>
<p>«qatlhej je» jatlh <i>Legolas,</i> «mughIjbe'mo' Heghpu'wI'.»</p>
<p>«QormeH mIw lIjpu'be' ghot lulIjlu'pu'bogh 'e' vItul» jatlh <i>Gimli,</i>
«lIjpu'chugh DISujnISbe'.»</p>
<p>«<i>Erech</i>Daq mapawchugh 'e' wIghoj» jatlh <i>Aragorn.</i>
«'ach <i>Sauron</i> luSuv 'e' lulay', 'ej 'Ipvetlh wem; vaj
SuvnIS 'Ip luta' luneHchugh. <i>Erech</i>Daq Qam nagh qIj;
jatlhlu' <i>Númenor</i>vo' qem <i>Isildur;</i> HuDDaq lanlu',
'ej <i>Gondor</i> cherlu'pu'DI' <i>Isildur</i> boq HuD ta' 'e'
lay'meH HuD ta', nagh pongpu'. 'ach cheghDI' <i>Sauron</i> 'ej
HoSghajqa'DI', 'Ipchaj luta'meH HuD loD rIt <i>Isildur,</i> 'ej
ta'Qo': <i>Sauron</i> luquvmoHmo' qaStaHvIS DISmey
lunaDHa'lu'bogh.</p>
<p>«ghIq ta'DajvaD jatlh <i>Isildur:</i> <ta' Qav SoH.
pIn'a'chaj qIj jeychugh 'ev tIng loD, SoH nughlIj je vI'Igh: not
SuleS 'Ipchaj Data'pa'. qaStaHvIS DIS lutoghbe'bogh qaS noHvam,
'ej borItqa'lu' rInpa' noH.> 'ej tlheD <i>Isildur</i>
QeHmo', 'ej <i>Sauron</i>vaD Qoj 'e' ngIlbe'; 'ej HuD Daqmey
peghDaq So''egh 'ej latlh loDpu' Huqbe', 'ach QIt HuD chImDaq
machchoH. 'ej <i>Erech</i> HuD yoSDaq nugh DabmeH DaqmeyDaq je
ghIj Qongbe'bogh Heghpu'wI'. 'ach tavetlh vIghoSnIS, muQaHlaHbe'
yInwI'.»</p>
<p>Hu'. «Ha'!» jach, 'ej yanDaj QemHa', 'ej nom vengHom vaS
choSDaq wov. «<i>Erech</i> naghDaq! Heghpu'wI' taw vIghoS.
mutlhej tlhejqangwI'!»</p>
<p>jangbe' <i>Legolas Gimli</i> je, 'ach Hu' 'ej vaSvo' <i>Aragorn</i>
tlha'. ghommeH yotlhDaq loStaH <i>Rangers</i>; nachDaj
luvellu'pu'; vIHbe'taH 'ej tamtaH. lIghrup <i>Legolas Gimli</i>
je. <i>Roheryn</i>Daq Sup <i>Aragorn.</i> ghIq gheb'a' rIlrup
<i>Halbarad,</i> 'ej <i>Helm's Deep</i> Dat Daq Qoylu': 'ej
ghIq pay' lIghchoH; <i>Coomb</i> bIS'ubDaq lIghtaH; pe'bIl wab
rur, bejtaHvIS reDDaq vengHomDaq ghap ratlhbogh loD 'ej
lumerlu'bogh.<br>
</p>
</blockquote>
<pre class="moz-signature" cols="72">--
SuStel
<a class="moz-txt-link-freetext" href="http://trimboli.name">http://trimboli.name</a></pre>
</body>
</html>