<p dir="ltr">helms deep luDechtaHvIS orc 'ej lIb QIHna'Daj, theodenvaD jatlh aragorn:</p>
<p dir="ltr">joHwI', QaH wISuqmeH 'ej pawmeH boqwI'pu', lIghwI'pu' tIngeH.</p>
<p dir="ltr">'a jang theoden: ..'ej nuQaHmeH paw 'Iv. elves dwarves joq DapIH'a'. juppu'lI'mo' bIDo' 'a pIrurbe'..</p>
<p dir="ltr">ghIq jatlh aragorn: nuQaH gondor..</p>
<p dir="ltr">'a mu'meyDaj naQmoHpa', qagh theoden: gondor, bImeq'a'. 'op poH ret, nuDechtaHvIS jaghpu'ma', nuqDaq 'oH gondor.</p>
<p dir="ltr">nuqDaq 'oH gondor.. DaH mu'meyvam DIqel net 'utmoH.. nuqDaq 'oH gondor..</p>
<p dir="ltr">Human neH maH, 'ej DI'rujvammo' mapujba'. pIj, nuDech jaghpu' rurbogh ghu'mey'e', 'ej pIj nuDechtaHvIS gholpu' mangghommey mamob. mamobchu'.</p>
<p dir="ltr">ngugh, maQaDchoHmeH, pay' SaHchoH latlhpu' 'e' wItul, vabDot SaHchoH nulonta'bogh nuvpu'. 'ach vIt 'IQ wIjunlaHbe': maHvaD paw pagh.. not.</p>
<p dir="ltr">ropyaH qachDaq vatlh law' SID vIleghpu', 'ej Do'Ha' Heghpu' 'op SID. 'IQ ghu'vam; 'ach 'IQqu' latlh ghu': HeghtaHvIS mob HochHom.</p>
<p dir="ltr">'ej, qaStaHvIS Qu'wIj poH, 'ej SIDpu'vam vIlegh jIQubtaH.. qorDu' ghaj nuvpu'vam, latlhpu' ghaj nuvpu'vam, pIvtaHvIS mobbe' nuvpu'. DaH, qatlh lon Hoch.</p>
<p dir="ltr">tagha', mamob. qo'vamDaq maboghDI' mapuj 'ej pagh wISov; qo'vamvo' wItlheDtaHvIS, mapujqa' 'ej SaHqang pagh.</p>
<p dir="ltr">vaj, nughelqa' theoden: maHvaD paw 'Iv.<br>
'ej majangmeH wa' mu' neH wIjatlh net poQ: pagh'e'.</p>
<p dir="ltr">qunnoH jan puqloD<br>
ghoghwIj HablI'vo' vIngeHta'</p>