[tlhIngan Hol] jIHem; tlhIngan vIrur

Hugh Son puqloD Hugh at qeylIS.net
Wed Nov 13 19:22:29 PST 2019


povvam DuSaQvo' juHDaq puqwI' vIluppu'. puH Duj wIyongHa'pu' 'ej DuSaQ buqDaj vIleltaHvIS tep 'aplo'Daq tlhIngan Hol mu'ghom tu'pu' ghaH. qen qaSpu'mo' Sepqep puH Duj tep 'aplo'Daq ratlhtaH 'op tlhIngan Hol paq.

mughelpu'; jatlhpu': «nuq 'oH paqvam'e'» (DIvI' Hol jatlhtaHvIS)
vIjangpu'; jIjatlhpu': «mu'ghom 'oH»
«mu'ghom Sar yIngu'»
«tlhIngan Hol mu'ghom 'oH»

ghIq mu'ghom tlhappu' 'ej poSmoHpu'. tenwal Haw cha'choHlu'pu'. «pIv» jatlhpu', tlhIngan Hol qolchu'taHvIS.

qen laDchoHlaHpu' puqwI'. wa'wen vay' laD 'e' nIDDI' QIt laDtaH 'ej pIj mu' laDHa'. cha' Hogh ret neH laDchoHlaHqu'pu'. qeqqu'taHmo' 'ej nom laDmeH laHDaj Dubqu'taHmo' jIHem. tlhIngan Hol mu'Daj wa'DIch leghpu'DI' SIbI' laDlaHchu'pu'mo' jIHemqu'.

«bIlugh 'ej bIqolchu'; “be healthy” 'oS» jIjatlhpu' (DIvI' Hol vIjatlhtaHvIS; DIvI' Hol «pIv» 'oSbogh mu''e' vImughbe' neH)
laDqa' puq; jatlhpu' «”be healthy”. bIlugh. chay' DaSov?»



More information about the tlhIngan-Hol mailing list