[tlhIngan Hol] ghop Hol

[Will Martin]

ghop Hol vIghojlI’. DIS bID cha’DIch ghojmeH ghom vIjeS.

chaq Dumer ngoDvam: pImqu’ 'amerI’qa’ngan Hol jatlhlu'bogh amerI’qa’ngan ghop Hol je. ‘amerIqa’Daq QoylaHbe’wI’pu’vaD vIranSe’ngan ghop Hol lo’ DuSaQ wa’DIch. DuSaQDaq ghomDI’ QoylaHbe’bogh puqpu’, mu’ghom pab je choHmoH ‘amerIqa’ngan puqpu’. juH mu’mey chel. qaS poH. choH Hol.

qatlh vIranSe’ngan ghop Hol lo’?

‘amerIqa’Daq QoylaHbe’bogh puqpu’vaD chenDI’ DuSaQ wa'DIch, [England]Daq ghop Hol lo’Qo’ DuSaQ. wuSDu’ laDnIS ghojwI’pu’. roD wejmaH vatlhvI’ mu’mey luyajlaHlu’ wuSDu’ laDtaHvIS.

Qoy’eghlaHbe’taHvIS ghojwI’pu’, jatlhnIS. moghchu’bogh ghojwI’pu’ SaHbe’ ghojmoHwI’pu’. QIp QoylaHbe’wI’pu’ net Har. loQ yajlaHchugh, maj. qay’be’.

vIranSe’Daq QoylaHbe’bogh puqpu’vaD ghop Hol lo’ DuSaQ. vaj vIranSe’vo’ ‘ameriqa’Daq ghoS vIranSe’ngan ghop Hol.

rut choHbe’ mu'mey qubHa’. [P]vaD ghop “shape” lo’ mu’ {noj}. [L]vaD ghop “shape” lo’be’. [prêter] ‘oH vIranSe’ngan mu’’e'. [lend] ‘oH ‘amerI’qangan mu’’e’. [C]vaD ghop “shape” lo’ mu’ {nej}. vIranSe’ngan mu’ ‘oH [chercher]’e’.

wot [to be] Hutlh ghop Hol. rur tlhIngan Hol. {tlhIngan jIH} yajlaH ASL jatlhwI’, ‘ach {jIH tlhIngan} qoj {jIH tlhIngan jIH} jatlhlu’ je.

not jatlh ASL jatlhwI’ {jIghungmo’ Soj vInej.} qaq {Soj vInej. qatlh? jIghung.}

not jatlh ASL jatlhwI’ {jIlaD, ghIq jISop.} qaq {jIlaD. pItlh. jISop.}

Holvam vItIvqu’.

charghwI’ ‘utlh

SKI: charghwI’ talks about American Sign Language and how it differs from spoken English.

-------------- next part --------------
An HTML attachment was scrubbed...
URL: <http://lists.kli.org/pipermail/tlhingan-hol-kli.org/attachments/20190129/743ee3a5/attachment-0001.htm>