[tlhIngan Hol] HoS'a' Dop Hurgh

[mayqel qunenoS]

lo'wI'pu'DajvaD, Qaw'meH laHmey noblaH Dop Hurgh. 'ej lo'wI'pu'DajvaD Sar
rap laHmey noblaH je Dop wov. laHvam lupatlhmoHlu', vaj tugh tlhoj: Dop
Hurgh laHmey HoSghaj law' Dop wov laHmey HoSghaj puS. 'a latlh Sar laHmey
tu'lu', 'ej ngoQvam nIv Dop wov.. vormeH laH bIH laHmeyvam'e'..

pIv'eghqa'moHlu'meH 'ej porghDaj tI'lu'meH, Dop wov lo'laH vay'. ngoQ rap
luchavlu'meH Dop Hurgh lo'laH je vay'. 'a Dop Hurgh lo'lu'chugh, 'ej tagha'
ngoQvam luchavlu', vaj qaStaHvIS poH ngaj neH taH tev. chIch Dop Hurgh
lo'lu'taHvIS, (qaStaHvIS wanI'vam neH), QaplaH Dop Hurgh vormeH HoSmey. rop
vorlu'meH Dop Hurgh lo'lu'chugh, 'ej Qap, Dop Hurgh lo'be'choHlu'DI', vaj
qaSqa' rop.

povbogh ghantoH law' tu'lu'; 'ej *darth bane* *darth vader* je Dop Hurgh
vormeH laHmey bIH cha' ghantoH'e'. ghaH HoHlaHbogh tar'e' 'ommeH *darth
bane*, latlhpu' 'oy' bep je lo'. HoS'eghmoHmeH *bane* latlhpu' 'oy' bep je
lo', 'a tagha' vor'eghchu'meH vorwI' *caleb* boQ poQ *bane*.

taghDu'Daj vormeH *darth vader*, Dop Hurgh lo'; 'ej taghDu'Dajvo' Heghbogh
tagh 'ay'mey lellaH. vaj tagha', yIntagh lo'nISbe'. 'a chavvam leHtaHmeH,
Dop Hurgh buSnISchu'taH. pay' buSbe'choHchugh, qoj pay' muSbe'choHchugh,
vaj SIbI' rIQqa' taghDu'Daj.

'ej *darth sion* ghantoH tu'lu' je.. Dop Hurgh vormeH laHmey lo' chIwchu'
*darth sion* ghantoH. Dop Hurgh HoSna' chIw ghantoHvam; 'a Dop Hurgh pujna'
chIw je..

*sion* porgh ghorlu'ta', 'ej Heghlaw' porghDaj; *sion*vaD 'oy'taH porghvam.
vaj, porghDaj mutlhqa'meH *sion*, 'ej qIvonDu'Daj HumchuqmoHmeH *sion*, Dop
Hurgh HoS lo'; 'ej Dop Hurgh HoS je'meH *sion*, 'oy''a'Daj lo'taH:
'oy''a'vammo', QeHqu'laHtaH, 'ej QeHqu'choHtaHvIS ghur HoSDaj. ghIq,
HoSvammo', rIQqu'choHtaHvIS taHlaH *sion*. Dop Hurgh SIr'o'Daq SumchoHchugh
*sion*, HoHlaH paghHey. 'a, tagha' QeH'a'Daj lonmeH *sion*, pon *meetra
surik*. 'ej *sion* ponta'DI' *surik*, SIbI' Dej *sion* porgh 'ej Hegh.

********

nom wa' porgh pIvqa'laHmoH Dop wov, 'ej ngoQvam chavlu'ta'DI', Hochlogh
ratlhlaH wanI'vam. 'a Dop Hurgh lo'wI'pu' puS tu'lu' (pIv'eghqa'moHlaHbogh
nuvpu'), 'ej pIvqa'DI' nuvpu', qaStaHvIS yInchaj Hoch pIvlaHtaH.

*count dooku* ghaH wa' ghantoH'e'; porghDajvo', ghaH ngejbogh nuH'e'
lellaH. *dooku*vaD nuHvam ngejmoH *jango fett*, SutlhtaHvIS *dooku* *fett*
je, 'ej *dooku* raDmeH *fett*, vang.

wa' latlh ghantoH tu'lu'; *darth plagueis*. *plagueis* lurIQmoHta'
*maladian* HoHwI'; lurIQmoHta' 'ej ghIq qaS maH law' DIS. qaSpu' poHvam, 'a
pIv'eghqa'moHmeH *midichlorian*mey SIghlaH *plagueis*, vaj tagha' tlhoS
vor'eghlaHchu'.

'a, DaH wa' ngoD potlh wIqelnIS; Dop Hurgh HoS lo'be' mIw'e' lo'ta'bogh
*plagueis*, 'ej mIwvam lo'laH *plagueis* neH. 'ej chaq vor'eghtaHvIS
*dooku*, Dop Hurgh lo'be', 'ej ngoQvam chavmeH chaq *jedi* SovDaq lo'.

~ nI'ghma
-------------- next part --------------
An HTML attachment was scrubbed...
URL: <http://lists.kli.org/pipermail/tlhingan-hol-kli.org/attachments/20180215/0eb46261/attachment.htm>