[tlhIngan Hol] HoS'a' Dop Hurgh

[mayqel qunenoS]

Dop Hurgh HoS

pIj, Sol *jedi*pu' HoS'a' Hurgh lo'wI'pu' je; 'ej Dop Hurgh HoS lungach.
jatlh HoS'a' Hurgh lo'wI'pu': qa'maj DI'onmey Hurgh DIlajmo', mamIghmo',
manaHmo', HoS wIchav, 'ej HoSvam nIv law' Dop wov HoS nIv puS.

'a, Qoch *jedi*pu' latlh Dop wov lo'wI'pu' je, 'ej jatlh: HoS vItlh
chavlu'meH qIgh 'oH Dop Hurgh'e'. 'a SIbI'Ha', bep QIH'a' je qaSmoH qIghvam.

teH; Dop Hurgh lulajta'DI' 'op nuv, nom HoS'a' ra'choHlaH. *darth caedus*
lurur nuvvam. QIH'a' luqaSmoHlaH, QIH'a''e' HarlaHbe'bogh vay'
luqaSmoHlaH.. puyjaq'a' luqaSmoHlaH, HoS'a' *storms* luqaSmoHlaH. 'ej
*katarr* QIHna' lururbogh wanI''e' qaSmoHlaH je. ta'meyvam luleghlu'taHvIS,
ta'meyvam yajlaHbe' vay'.. vaj, SIvtaH: chay' ta'meyvam chavlaH vay' ?
chay' HoSvam vItlh SeHlaH wa' ghot neH ?

vaj, (meq *sith*pu'), Dop Hurgh lulo'qangbe'mo' 'op nuv, qoHpu' DoghwI'pu'
je chaH nuvvam'e'. 'ej jatlh *sith*pu': wa' HoS'a' Dop le' lulajQo' 'op
nuv, 'a Dopvam HoSghaj law' latlh Dop HoSghaj puS.

Dop Hurgh HoS 'aghlu'taHvIS, HoSvam luleghlaH latlh; 'ej wa' ghantoH 'oH
HoS'a' *storm*mey'e'. HoS rap lulInglaH *jedi*pu', 'a HoSvam lulo'taHvIS
*jedi*pu', QIHna''e' luqaSmoHlaHbogh *sith*pu' luqaSqangbe'moH. HoSghajqu'
*sith*pu', 'a HoSvam vItlh lughajmeH, tlhoy SIQnIS, 'ej rut bechnIS..

laH Sar ghaj *sith*: HoS'a' *storm* lururbogh laH'e' ghaj; 'ej HoS'a'
*drain* Sar lo'bogh *darth nihilus* tu'lu'. 'a laHmeyvam lo'laHmeH
*sith*pu', Dop Hurgh lu'elnISchu'. wa' lumojnISchu' *sith*pu' Dop Hurgh je.
'a SIbI'Ha', qalchoH HoSmeyvam Hurgh lo'wI'pu' porgh.

*darth sidious* ghaH wa' ghantoH'e'; qa'Daj porghDaj je natlhtaHmo' Dop
Hurgh, qanchoHtaHvIS qalchoHtaH. *sidious* HoHta' *anakin skywalker*, 'a
yInqa'laH *sidious*. yInchoHDI', HoSghajqu'mo' 'ej Dop Hurgh HoS 'Iq
ghajmo', nom qalchoHchu' velqa' porghmey'e' Dabbogh *sidious*. *sidious*
HoSna' luSIQlaHbe' velqa' porgh. vaj, wa' velqa'vo' latlh velqa'Daq nom
qa'Daj QaynIS *sidious*.

'a latlh ghantoH tu'lu', 'ej ghantoHvam Doj law' ghantoH vorgh Doj puS..
*darth nihilus* ghaH ghantoHvam'e'. ghurtaHvIS HoSDaj, *nihilus* natlhchu'
Dop Hurgh, vaj porghDaj Sangchu' HoS'a' Hurgh, 'ej taHlaHmeH *nihilus*
SIryoDDajDaq qa'Daj qatnIS.

~ nI'ghma
-------------- next part --------------
An HTML attachment was scrubbed...
URL: <http://lists.kli.org/pipermail/tlhingan-hol-kli.org/attachments/20180205/83a5c38e/attachment.htm>