[tlhIngan Hol] Rendered fat

[Ed Bailey]

QeS, bIQIj 'e' DaQoy DaneHmo', choquvmoH. vaj vuDwIj vIQIjmeH vIvum 'e'
Daqotlhbej.

wa'DIch jIQIjbe', pIj Sojvam ngachlu'pu'mo' 'ej Sojvam wuqlaHmo' marq
'oqranD neH. tagha' wuq marq 'oqranD 'e' vIjInqu', jIjatlhpu'. wuqchugh,
ramchoH Hoch latlh vuD.

jIQIjchoHpa', paghDIch mIw vIja'. taghwI' jIHtaHvIS, jIngongmeH jIngong
vIneH. Dayaj'a'? wotDaq DIpDaq je mojaqmey vImutlh ngugh vIneH.
naQjej rurmo' wot, ghantoH <chuH> vIlo'. vay''e' chuHlu'bogh 'oSbej
?chuHlu'wI' 'e' SIbI' vItlhoj. lughqu'law', 'a wa'DIch DujwIj vIvoqmo' neH.
meq vIngu'laHbe'pu'. vay' vIHaDnISbogh vItu'pu'. <yIvoq 'ach yI'ol>, qar'a'?

cha' mojaqvam luDuDlu' 'e' tuch'a' TKD, ngugh 'e' vISIv. TKD 3.2.2
vIlaDpu'. wotDaq <-wI'> chellu'DI', DIp moj wot 'ej mu'tlheghDaq wotvam
tlha'bogh DIp'e' 'oS DIpvam chu' 'e' QIj TKD. vaj chuHbogh vay' 'oS chuHwI'.
Hoch QIjbe' TKD. DIp nap chenmoH wot <-wI'> je 'e' nughojmoH TKD, 'ach
<-wI'> latlh mojaq je ghajchugh wot, qaSbogh wanI' 'angbe' TKD. 'a qay'
<-lu'> neH 'e' wIloylaH. ghu' le' 'oHba' wot'e' tlhejbogh <-lu'>.

nItebHa' qaSlaHbe' wot, <-lu'>, <-wI'> je lutob mu'mey'e' lo'pu'bogh marq
'oqranD net Qub. TKD 3.2.2 qontaHvIS, ghu'vam qelbe'taH 'e' vIQub.

cha' meqmo' ghu' le' 'oH wot'e' tlhejbogh <-lu'>.

wot tlhejtaHvIS <-lu'>, mu'tlheghDaq wotvam tlha'laH pagh DIp. meq
wa'DIch'e' 'oH ngoDvam'e'.

wot tlha'bogh DIpvaD per vIHutlh. naQjej rurmo' wot, DIpvamvaD <chuHwI'
DIp> vIper. wot nungbogh DIpvaD <DoS DIp> vIper.

wot tlhejtaHvIS <-lu'>, moHaq pIm poQ wotvam je. meq cha'DIch 'oH
ngoDvam'e'.
DoS DIpvaD chuHwI' DIp DamoH rom chut. So'bogh DoS DIp chu' jal rom chut
je, vaj DoS DIpvam chu'vaD <ghaH> <'oH> ghap qellaH vay' 'e' ghet moHaq le'
DIlo'bogh. 'a potlhbe', mu'tlheghDaq DI'rujDaq ghap DoS DIpqoqvam chu'
tu'be'lu'mo'. wotvaD DoS DIp 'oHtaH nungbogh DIp'e'. moHaqvaD chuHwI' DIp
mojlaw' nungbogh DIp. ghu'vam vIqelmeH DIvI' Hol qechmey /subject/ /object/
je, jImISqu'choH. 'ach vuDlIj QIjmeH /subject/ /object/ je wuv SuStel.
rarchu'be' tlhIngan Hol, qechmeyvam je 'e' vIQub.

ghu'vam le'mo', SuStel vuD vIHon. latlh meq vIghaj. 'oSlaHbe' wot'e'
tlhejbogh <-lu'> <-wI'> je, 'eb lonlu'pu' 'ej pagh chavlu'. mu' chenmoHmeH
mIw DuH lonlu'. vaj vay' chuHlu'bogh 'oSlaHbe' ?chuHlu'wI' 'ej cha' mu'
DIlo'nIS. <vay' chuHlu'bogh> vIlo'laH, 'a jIHvaD <?chuHlu'wI'> 'IH law'
<vay' chuHlu'bogh> 'IH puS, ngajmo' ?chuHlu'wI' 'ej nItebHa' chang'eng
luchenmoHmo' chuHwI' ?chuHlu'wI' je. me'ghan poQ Hoch 'er'In.

chaq Sov puS vIghaj 'ej chaq vulqangan meqmey rurbe' Hoch meqmeywIj. Sov
law' ghajbej SuStel, 'a vulqangan meqmey lo'law' je. potlh Sov, 'a tlhIngan
HolvaD muj vulqangan meqmey 'e' vIQub je.

jagh QaHbe'nISlu' 'a vuDDaj meq qaq buSHa'law' SuStel. wot tlhejbogh <-lu'>
<-wI'> je ngaSbogh mu'tlhegh naDpu''a' marq 'oqranD? ghobe' vIQub. chaq not
wuqnIS, pagh chaq tu'qomvam par, pagh chaq latlh meg ghaj. wa' 'eb jonmeH
cha' 'eb lon neHbe' 'e' vItu'. Sojvam wuqchugh, latlh 'eb lon chaq 'e' jal.

vuDwIjvaD meq yap vI'ang 'e' vItul. 'a ram vuDwIj, Qochchugh marq 'oqranD.
'e' vIlajchu'.

~mIp'av
-------------- next part --------------
An HTML attachment was scrubbed...
URL: <http://lists.kli.org/pipermail/tlhingan-hol-kli.org/attachments/20170220/7cf231c2/attachment.htm>