[tlhIngan Hol] Ha'DIbaHvam Doj bongu'laH'a'?

[Ed Bailey]

wa'Hu' 'uQ wISoppu'DI', HaSta jIH wIbejtaH puqbe'wI' jIH je. Ha'DIbaH mut
Dajqu' bop much. much wIbejpa', mutvam Sov puqbe'wI', 'a jIHvaD chu'chu'.

'avrI'qa' tIng chan tIng Sep Dab mutvam. Ha'DIbaHvam vIDelchugh, chaq DIvI'
Hol pongDaj boloy. cha' mu' ngaS DIvI' Hol pongDaj. pongDaj Hevpu', wutlh
QemjIq Dabbogh Ha'DIbaH qu' rurmo' 'ej Su'ghar taS'e' lIngbogh ghewmey
maSqu'mo'. taSvam SuqmeH, wej vatlhlogh 'aw'lu'pu'chugh SaHbe'.

mutvam vel veD qIj, 'a DopDajDaq veD chIS HeH tu'lu' 'ej tlhoS chIS DubDaj.
nenDI', motlh cha' 'uj 'ablaH porghDaj, 'ej chaq wa' 'uj 'ab tlhuQ je.
HIvmeH 'ej QemjIq chenmoHmeH, pach HoS ghaj. yavDaq QemjIq chenmoH 'e'
DapIH, bImuj. Sor Hap 'echlet Sub veghlaH.

chon 'ej qor mutvam. wIjwI'vaD qay'. Du' Ha'DIbaH HIv 'ej HoH 'ej Sop.
Su'ghar taS lIngbogh ghewmey mID pol je 'op wIjwI', 'ej mIDmeyvam Qaw'
mutvam.

qu'chu' mutvam. Hoch Ha'DIbaH HIvqanglaw'. SepvamDaq vIghro''a'mey tu'lu'.
'avrI'qa'Daq magh SepmeyDaq vIghro''a'vam tu'lu' 'ej nItebHa' Ha'DIbaH
tInqu' chon. Qobqu', 'a vIghro''a'vam HIvvIpbe'qu' Ha'DIbaH vIDeltaHbogh.

valqu' je. Dat 'ellaH 'ej botlaHbe' wIjwI'. vonlu'chugh, latlh Hub Qav
ghaj. He'So'qu'bogh betgham ghaylaH.

meqmeyvam law'mo' Doj Ha'DIbaHvam. 'a 'amerI'qa' 'ev chan 'evDaq naDev
Dabbe'mo' jIQuch.

toH, mutvam ngu'laH 'Iv?

~mIp'av
-------------- next part --------------
An HTML attachment was scrubbed...
URL: <http://lists.kli.org/pipermail/tlhingan-hol-kli.org/attachments/20161117/1e6209be/attachment.htm>